काठमाडौं । अविरल वर्षाका कारण मुलुकको आन्तरिक हवाई उडानमा सामान्य असर परेकोे छ । त्रिभुवन अन्तर्राष्ट्रिय विमानस्थलका अनुसार वर्षाका कारण ‘भिजिबिलिटी’ कम भएकाले आन्तरिक उडानमा समस्या आएको हो ।
विमानस्थलका महाप्रबन्धक प्रतापबाबु तिवारीले प्रतिकूल मौसमका कारण आन्तरिक उडान रोकिएकोे जानकारी दिए । आन्तरिक उडान रोकिए पनि अन्तर्राष्ट्रिय उडान भने नियमित सञ्चालन भइरहेको उनले उल्लेख गरे ।
विभिन्न गन्तव्यमा उडान रद्द भएको एयरलाइन्स कम्पनीहरुले पनि जनाएका छन् । बुद्ध एयरका सूचना अधिकारी दीपेन्द्रकुमार कर्णका अनुसार बुधबार पनि सुर्खेतको दुई र तुम्लिङटार गन्तव्यको एक उडान रद्द भएको थियो ।
पोखराबाट भरतपुर र पोखरा–नेपालगञ्जको सबै उडान रद्द गरिएका थिए । आज बिहीबार पनि कतिपय उडानहरुमा समस्या देखिएका छन् ।
जल तथा मौसम विज्ञान विभाग, मौसम पूर्वानुमान महाशाखाका अनुसार बुधबारदेखि लगातार तीन दिनसम्म वर्षा जारी रहनेछ । आज काठमाडौं उपत्यकासहित देशका अधिकांश स्थानमा हल्कादेखि मध्यम वर्षा भइरहेको छ ।
