काठमाडौं । नेपाल धितोपत्र बोर्ड (सेबोन)ले दुई हाइड्रोपावरलाई कम्पनीलाई हकप्रद सेयर निष्काशनका लागि अनुमति प्रदान गरेको छ । बोर्डले अरुण भ्याली हाइड्रोपावर र रिडी पावर कम्पनीलाई हकप्रद सेयर निष्काशनका लागि अनुमति प्रदान गरेको हो ।
बोर्डले अरुण भ्यालीलाई १०० प्रतिशत र रिडी पावरलाई ५० प्रतिशत हकप्रद सेयर बिक्री गर्न अनुमति प्रदान गरेको हो ।
बोर्डले अरुण भ्यालीलाई १ः१ अनुपातमा १ करोड ८६ लाख ७९ हजार ६२६ कित्ता हकप्रद सेयर बिक्री गर्न अनुमति दिएको छ ।
हाल कम्पनीको चुक्तापुँजी १ अर्ब ८६ करोड ७९ लाख ६२ हजार ६०० रुपैयाँ छ । कम्पनीले सोही पुँजीमा १०० प्रतिशत हकप्रद सेयर जारी गर्नेछ ।
हकप्रद सेयरबाट प्राप्त रकममध्ये ९३ करोड ३९ लाख ८१ हजार ३०० रुपैयाँ ३० मेगावाट क्षमताको लिखु खोला जलविद्युत आयोजना निर्माणको लागि आवश्यक पर्ने स्वपुँजीको लागि पीके हाइड्रोपावर प्रालिको संस्थापक सेयरमा लगानी गर्ने कम्पनीले बताएको छ । यस्तै, बाँकी ९३ करोड ३९ लाख ८१ हजार ३०० रुपैयाँ भने हाल सञ्चालनमा रहेको काबेली–१ क्यास्केड जलविद्युत आयोजनाको निर्माण गर्दा बैंकहरुबाट लिएको ऋण भुक्तानी गर्न प्रयोग हुनेछ ।
त्यस्तै, रिडी पावरले ५० प्रतिशत हकप्रद जारी गर्न अनुमति पाएको छ । कम्पनीले १ः०.५ अनुपातमा कुल ७७ लाख ४४ हजार ५०६ कित्ता सेयर हकप्रद जारी गर्न अनुमति पाएको छ ।
कम्पनीले आफ्नो लगानी तथा व्यवस्थापनमा रहेको साझा पावर डेभलपमेन्ट कम्पनीको स्वामित्वमा रहको तल्लो बलेफि जलिविद्युत आयोजना निर्माण गर्न र उक्त आयोजनामा स्वपूँजी व्यवस्थापन गर्नका लागि हकप्रद सेयर निष्काशन गर्न लागेको हो ।
हाल कम्पनीको चुक्तापुँजी १ अर्ब ५४ करोड ८९ लाख १ हजार २०० रुपैयाँ रहेको छ ।
