काठमाडौं। एशियन हाइड्रोपावरले सर्वासाधारणलाई माघ २७ गते आईपीओ बिक्री गर्ने जनाएको छ । कम्पनीले वैदेशिक रोजगारीमा गएकालाई पनि आइपीओ निष्कासन गर्दैछ ।
सर्वसाधारणले ६ लाख ९७ हजार २०० कित्ता प्राथमिक सेयरमा आवेदन दिन सक्नेछन् । यस्तै, वैदेशिक रोजगारीमा गएकालाई कम्पनीले ८४ हजार कित्ता छुट्याएको छ ।
कम्पनीले जारी पुँजी ३४ करोड रुपैयाँको २४.७१ प्रतिशत प्राथमिक सेयर जारी गर्दैछ । १०० रुपैयाँ अंकित मूल्यमा यो कुल ८ लाख ४० हजार कित्ता हुन्छ। यसको १० प्रतिशत वैदेशिक रोजगारीमा गएकाहरुको भाग हो।
५ प्रतिशत अर्थात ४२ हजार कित्ता म्युचुअल फण्ड र २ प्रतिशत अर्थात् १६ हजार ८ सय कित्ता कर्मचारीहरुको हिस्सा हो। बाँकीमा सर्वसाधारणले आवेदन दिने हुन् ।
आवेदकले कम्तिमा १० कित्ता सेयरका लागि आवेदन पेस गर्नुपर्नेछ । अधिकतम २० हजार कित्तासम्म पाइन्छ । आईपीओ बिक्री छिटोमा फागुन २ गते बन्द हुनेछ । सो म्यादसम्म पर्याप्त आवेदन नआए फागुन १२ गतेसम्म लम्बिने छ ।
