काठमाडौं । सुपर मादी हाइड्रोपावर लिमिटेडको आईपीओमा करिब ७ गुणा बढी आवेदन परेको छ।
सीडीएससीका अनुसार आज अपराह्नसम्म कम्पनीको आईपीओमा १० लाख २७ हजार ८४३ आवेदकबाट १ करोड १९ लाख २ हजार ५०० कित्ता सेयर खरिदका लागि आवेदन परेको थियो। यो मागभन्दा ६.८३ गुणाले बढी हो।
मागभन्दा बढी आवेदन परिसकेका कारण यो आईपीओको बाँडफाँट गोलाप्रथाबाट गरिनेछ। जसमा भाग्मानी १ लाख ७४ हजार ३०० जनाले १० कित्ताका दरले सेयर पाउनेछन्।
कम्पनीले माघ ९ गतेबाट सर्वसाधारणका लागि आईपीओ निष्कासन तथा बिक्री खुला गरेको हो ।
कम्पनीले जारी पुँजी २ अर्ब १० करोड रुपैयाँको १० प्रतिशतले हुन आउने २१ करोड रुपैयाँको आईपीओ जारी गरेको हो।
जसअनुसार कम्पनीले १०० अंकित दरका कुल २१ लाख कित्तामध्ये वैदेशिक रोजगारीमा रहेका नेपालीका लागि १० प्रतिशतले हुन आउने २ लाख १० हजार कित्रा बिक्री गरिसकेको छ भने ५ प्रतिशतले हुन आउने १ लाख ५ हजार कित्ता सामूहिक लगानी कोष र २ प्रतिशतले हुन आउने ४२ हजार कित्ता कर्मचारीका लागि सुरक्षित गरिएको छ।
बाँकी १७ लाख ४३ हजार कित्तामा सर्वसाधारणले खरिद आवेदन दिन पाउनेछन्।
लगानीकर्ताले न्यूनतम १० कित्ताले अधिकतममा ५० हजार कित्तासम्म खरिद आवेदन दिन सक्ने छन्।
कम्पनीको सेयर निष्कासन तथा बिक्री प्रबन्धकमा सानिमा क्यापिटल रहेको छ।
लगानीकर्ताले नेपाल धितोपत्र बोर्डको अनुमति प्राप्त सी(आस्बा सेवामा सहभागी बैंक तथा वित्तीय संस्था र तिनले तोकेका शाखा कार्यालय तथा सीडीएससीको मेरो सेयरबाट खरिद आवेदन दिन सक्नेछन्।
कम्पनीको आईपीओमा मागभन्दाबढी आवेदन परेकोले भोलि माघ १२ गते अन्तिम दिन रहेको छ ।
कम्पनीले कास्कीमा ४४ मेगावाटको सुपर मादी जलविद्युत आयोजना निर्माण गरिरहेको छ ।
