एजेन्सी । आईसीसी टी-२० विश्वकप क्रिकेटको पहिलो सेमिफाइनलमा आज (बुधबार) न्युजिल्याण्ड र इंग्ल्याण्डबीच पहिलो सेमिफाइनल खेल हुँदैछ ।
पहिलो सेमिफाइनलको खेल अबुधाबीमा हुनेछ । उक्त खेल नेपाली समय अनुसार राति पौने ८ बजेदेखि शुरु हुनेछ ।
इंग्ल्याण्ड समूह वानको विजेता र न्युजिल्याण्ड समूह टूको उपविजेताको रुपमा सेमिफाइनल प्रवेश गरेका टीम हुन् । इंग्ल्याण्ड र न्युजिल्याड दुवैले आफ्नो समूहमा ४ जित र १ हार व्यहोरेका थिए ।
इंग्ल्याण्ड एउटा टी-२० विश्वकपको उपाधी उचालिसकेको छ भने न्युजिल्याण्डले हालसम्म उपाधी चुम्न सकेको छैन । सन् २०१९ मा भएको एक दिवसीय क्रिक्रेटको फाइनलमा न्युजिल्याण्डलाई पराजित गरेर इंग्ल्याण्ड विश्वविजेता बन्न सफल भएको थियो ।
न्युजिल्याण्ड उक्त फाइनलको बदला लिएर टी-२० विश्वकपको फाइनल पुग्ने योजनामा छ ।
दुवै टीमका खेलाडीहरु उत्कृष्ट लयमा रहेकाले आजको खेल प्रतिस्पर्धात्मक हुने अनुमान गर्न सकिन्छ ।
टी–२० विश्वकपको दोस्रो सेमिफाइनलमा भोलि (बिहिबार) पाकिस्तान र अष्ट्रेलियाबीच खेल हुनेछ ।
