एजेन्सी । आईसीसी टी-२० विश्वकप क्रिकेट अन्तर्गत सुपर १२ को खेलमा श्रीलंका विजय भएको छ ।
सारजाहमा आइतबार भएको खेलमा श्रीलंकाले बंगलादेशमाथि ५ विकेटको जित निकालेको हो ।
बंगलादेशले दिएको १ सय ७२ रनको लक्ष्य श्रीलंकाले १८ ओभर ५ बलमा ५ विकेट गुमाएर पूरा गर्यो ।
श्रीलंकाको जितमा चारिथ असलन्काले अविजित ८० रन र भानुका राजपाक्षेले ५२ रनको अर्धशतकीय इनिङ्स खेले ।
बंगलादेशका नासुम अहमेद र शकिब अल हसनले २/२ विकेट लिए ।
यस अघि टस हारेर ब्याटिङको निम्तो पाएको बंगलादेशले २० ओभरमा ४ विकेट गुमाएर १ सय ७१ रन बनाएको थियो ।
बंगलादेशका मोहमद नाइमले सर्वाधिक ६२ रनको अर्धशतकीय इनिङ्स खेलेका थिए ।
यस्तै, मुस्फिकर रहिमले अविजित रहदै ५२ रन बनाए ।
श्रीलंकाका चामिका करुनारत्ने, बेनुरा फर्नान्डो र लाहिरु कुमाराले १/१ विकेट लिए ।
