काठमाडौं । सहिद स्मारक ‘ए’ डिभिजन लिग फुटबल अन्तर्गतको शुक्रबारको पहिलो खेलामा संकटा क्लब र सातदोबाटो युथ क्लबले बराबरी खेलका छन् ।
संकटा र सातदोबाटोले १-१ गोलको बराबरी खेल्दै अंक बाडेका हुन् ।
त्रिपुरेश्वरस्थित दशरथ रंगशालामा भएको प्रतिस्पर्धात्मक बनेको खेलमा सुरुआती अग्रता भने सातदोबाटोले बनाएको थियो ।
खेलको २३ औं मिनेटमा सुशील राईले गोल गर्दै सातदोबाटोलाई सुरुआती अग्रता दिलाएका थिए । संकटाका गोलकिपर राजाबाबु थापाको गल्तीको फाइदा उठाउँदै सुशीलले गोल गरेका हुन् ।
खेलको ३२ औं मिनेटमा जया गुरुङले डिबक्स बाहिरबाट आकर्षक गोल गर्दै संकटालाई खेलमा फर्काएका थिए । उनको गोल नै खेलको अन्तिम गोल रहयो । थप गोल नहुन सक्दा खेल १-१ कै बराबरीमा टुंगियो ।
यस बराबरीसँगै संकटाले ८ खेलमा १४ अंक जोडेको छ । संकटा लिगको तेस्रो स्थानमा रहेको छ ।
सातदोबाटो ९ अंक जोडेर आठौं स्थानमा रहेको छ ।
खेलको प्लेयर अफ दि म्याच संकटाका जया गुरुङ चुनिए ।
सातदोबाटोका आकाश बुढा मगर इमर्जिङ प्लेयर चुनिए ।