काठमाडौं । यो वर्षको दसैंको माहोल सुरु भैसक्नुपर्नेमा अझै बजारमा चहलपहल छैन । दुई दिन पछि घटस्थापना छ । घटस्थापनासँगै दसैं सुरु भएको मानिनेमा अहिले पनि बजार निराश नै रहेको छ ।
ठूलो चहलपहल हुन सकिरहेको छैन् । त्यसको विविध कारण मध्ये प्रमुख कारण बाढी पहिरो पनि हो ।
केहि दिनदेखिको निरन्तर वर्षापछि बाढी पहिरोको दशैभर घटनाहरु भए । धेरैको क्षति भएको छ ।
त्यसकारणले मानिसहरु खुलेर दसैं मनाउन नचाहिरहेको बजारको चहलपहलले देखाएको छ ।
अर्को विषयमा पानी पर्ने संभावना अझै रहेको मौसम विभागले प्रक्षेपण गरिरहेको छ ।
त्यसले पनि किलमेल गर्नेहरु पनि केहि दिन हेर र पर्खको स्थितिमा देखिन्छन् ।
तर उपत्यका बाहिर जान चाहनेहरु भने धेरै नै देखिएको छन् । दुई दिनमा २९ हजार नौ सय ५५ यात्रले बसको अग्रिम टिकट लिएका छन् । नयाँ बसपार्कबाट मात्र दुई दिनमा सो सङ्ख्यामा अग्रिम टिकट बिक्री भएको हो ।
सरकारले यही असोज १२ गतेदेखि चाडपर्वका लागि अग्रिम टिकट बुकिङ खुला गरेको थियो । यातायात व्यवस्था विभाग, काठमाडौँ उपत्यका ट्राफिक प्रहरी कार्यालय र नेपाल यातायात व्यवसायी राष्ट्रिय महासङ्घको गतहप्ता बसेको बैठकले गत शनिबारदेखि लामो दूरीका सवारीसाधनका लागि अग्रिम टिकट बुकिङ खुला गरेको थियो ।
नयाँबसपार्क सञ्चालनको जिम्मा लिएको ल्होत्से बहुउद्देश्यीय प्रालिका मानव संशाधन प्रमुख पङ्कज मल्लका अनुसार असोज १२ गते १८ हजार तीन सय ६५ र असोज १३ गते ११ हजार पाँच सय ९० यात्रुले अग्रिम टिकट लिएका थिए ।
सरकारले सुदूरपश्चिमको दार्चुला, धनगढी, टीकापुर, बझाङ, बाजुरा, प्यूठान, रुकुम, रोल्पालगायतका स्थान तथा पूर्वको काँकडभिट्टा, भद्रपुर, तेह्रथुम, खाँदबारी, ताप्लेजुङ, भोजपुर, इलाम, पशुपतिनगर, धरान, विराटनगरलगायतका स्थानमा जाने यात्रुलाई अग्रिम टिकट दिन सुरु गरेको हो । पृथ्वी राजमार्गअन्तर्गत गोरखा, पोखरा, लमजुङ, बागलुङ, म्याग्दी, स्याङ्जा, नुवाकोट, रसुवालगायतका छोटो दूरीमा जाने सवारीसाधनको टिकट भने चाँडै खुला गर्ने सरकारको तयारी छ ।
नेपाल यातायात व्यवसायी राष्ट्रिय महासङ्घका अध्यक्ष विजयबहादुर स्वाँरले दसैँ मनाउन घर जाने यात्रुलाई सुरक्षित तवरले गन्तव्यस्थलमा लैजान महासङ्घ लागिपरेको बताउनुभयो । वर्षाका कारण तीन दिनदेखि काठमाडौँमा रोकिएका सार्वजनिक सवारीसाधान क्रमशः नयाँ बसपार्कबाट गन्तव्यस्थलतर्फ जान थालेका छन् । दसैँमा २० लाखभन्दा बढी यात्रु प्रत्येक वर्ष उपत्यकाबाट बाहिरिने गरेको तथ्याङ्क छ ।
