काठमाडौं । नेपाल अन्तर्राष्ट्रिय कृष्णभावनामृत संघ (इस्कोन) द्वारा ३९ औं ऐतिहासिक श्री जगन्नाथ रथयात्रा महामहोत्सव भव्यताका साथ सम्पन्न भएको छ । उक्त रथयात्रा असार २३ गते आइतबारका दिन राष्ट्रपति रामचन्द्र पौडेलको प्रमुख आतिथ्यमा सम्पन्न भएको हो ।
नेपाली संस्कृतिको जगेर्ना तथा समाजमा आध्यात्मिक वातावरण स्थापनाको निम्ति प्रेरित उक्त रथयात्रा महोत्सव कमलादी/घण्टाघर/दरबारमार्ग/पुतलीसडक/प्रदर्शनी मार्ग/भद्रकाली/एन.ए.सी न्यूरोड/बसन्तपुर/न्यूरोड हुँदै टुडिखेलमा समापन गरिएको छ ।
यसरी सम्पूर्ण नगरवासिहरु भगवान नामको किर्तन गरेर भगवानको आराधना गरी हर्षोल्लासपूर्ण विधिले उत्सव मनाइएको छ । नेपाली इतिहासमा परापूर्व कालदेखिनै राजाको प्रमुख आतिथ्यमा यसैगरी रथयात्रा हुने गर्दथ्यो।
यसै संस्कृतिलाई निरन्तरता दिँदै राष्ट्राध्यक्ष सम्माननीय राष्ट्रपति रामचन्द्र पौडेलको उपस्थितिमा यस पटक पनि रथयात्राको सुभारम्भ भयो । सम्माननीय राष्ट्रपतिले वैदिक सनातन धर्मलाई संसारभरी प्रचार गर्ने इस्कोनका संस्थापक आचार्य कृष्ण कृपामुर्ति श्रीमद ए.सी. भक्तिबेदान्त स्वामी प्रभुपादलाई माल्यार्पण गरि सम्मान प्रकट गरे ।
राष्ट्रपतिले कमलादी स्थित नेपाल प्रज्ञा प्रतिष्ठानमा जगनाथ वलदेव शुभद्रा महारानी को दर्शन गरि भगवानको आरती गरेर नरिवल फुटाइ रथको डोरी तानी रथयात्राको उद्घाटन गरे । यस पश्चात इस्कोनका अध्यक्ष श्रदेय परमेश्वर अच्युत प्रभुजी बाट राष्ट्रपतिलाई श्री राधाकृष्णको फोटो फ्रेम अर्पण गरियो ।
साथै इतिहासमा जगन्नाथ पुरीका राजाले भगवान बिराजमान भएको रथ हिड्ने बाटो सुनौलो झाडु प्रयोग गरि मार्जन गर्थे । त्यसरी नै सम्माननिय राष्ट्रपतिले पनि मार्जन गरि वैष्णव संस्कारलाई निरन्तरता दिएका छन् ।
बिहान १०ः४० बजे बाट शुरु भएको यस कार्यक्रममा नगरवासीहरुको उपस्थितिमा भगवान नामको किर्तन, भगवानको दिव्य लिला बर्णित ग्रन्थको वितरण तथा दिव्य भगवानको प्रसाद वितरण गरिएको थियो । रथयात्रा मार्गमा नगरवासिहरुले आ(आफ्नो घर, स्थानबाट भगवानको स्वागत तथा पुजा अर्चना गरि आफ्नो मौलिक संस्कारलाई निरन्तरता दिइएको थियो ।
यसरी हजारौं भक्तहरुको उपस्थितिमा वर्षाको झरीमा पनि आनन्दका साथ प्रसाद वितरण गरि टुडिखेलमा रथयात्र समापन गरिएको थियो । यसरी नेपाली संस्कारको महत्व अहिले संसारभरि आवश्यकता रहेको र त्यसको पुर्तिको लागि यस रथयात्रा कार्यक्रमले एक अर्को पाईला चालेको इस्कोनले अपेक्षा गरेको छ।
अन्तराष्ट्रिय कृष्णभावनामृत संघ (इस्कोन) आध्यात्मीक संस्थाको रुपमा भक्तिवेद्धान्त स्वामी प्रभुपादले सन् १९६६ मा अमेरिकामा स्थापना गरेको अन्तराष्ट्रियस संस्था हो । यस संस्थाको मुख्य उद्धेश्य भनेको मानिसले भौतिक जगतको सामिप्यताले बिर्सेको श्रीकृष्णसँगको वास्तविक सम्बन्धको चेतना महशुस गराउनु हो ।
संसारभरिका १२०० ठुला तथा हजारौंको संख्यामा साना सेन्टरहरु मार्फत लाखौ भक्तहरु इस्कोनमा आवद्ध भई आफ्नो आध्यात्मीक चेतनाको विकास गरी कृष्णभावनाको प्रचार गरिरहेका छन् ।
