काठमाडौं । पछिल्लो समय नेपालमा स्केटिङ तथा स्केटबोर्डिङ खेल लोकप्रिय हुँदै गएको देखिन्छ । नेपालमा खासगरी स्केटिङ र स्केटबोर्ड खेल खेलाउन सन् २००८/०९ देखि अरनिको स्केट शपले नै विदेशी स्वयंसेवक ल्याई नेपाली युवा विद्यार्थीलाई भौतिकरूपमै सिकाउन थालिएको थियो ।
त्यसपछि नेपालमा सन् २०१५ मा ११ सदस्यीय ‘नेपाल स्केटिङ तथा स्केटबोर्डिङ संघ’ तदर्थ समिति गठन गरी यस खेलको औपचारिक सुरुआत भएको देखिन्छ । पचास वर्षभन्दा अघि अर्थात् १९७० मा अमेरिकाको क्यालिफोर्नियाबाट सुरु भएको स्केटिङ खेल संसारभर छिट्टै फैलन सफल भएको छ ।
‘नेपाल स्केटिङ तथा स्केटबोर्डिङ संघ’को आज यहाँ भएको पाचौं महाअधिवेशन उद्घाटनमा राष्ट्रिय खेलकुद परिषद्का सदस्य सचिव टंकलाल घिसिङले यो खेल युवा वर्गले रुचाउने तथा नेपालका लागि नयाँ खेल भएकाले पनि यसलाई व्यवस्थित गर्दै लैजानुपर्ने बताए ।
उनले यस खेलमा अन्य खेलको तुलनामा संघ दर्ता गर्ने मात्रैभन्दा पनि युवा सक्रिय भएको देख्दा खुसी लागेको उल्लेख गरे । कार्यक्रममा नेपाल ओलम्पिक कमिटीका महासचिव निलेन्द्रराज श्रेष्ठले स्केटिङ तथा स्केटबोर्डिङ खेल सुरुआत भएको छोटो समयमै पूर्वाधार निर्माणको सुरुआत भएको उल्लेख गर्दै यो खेल युवा वर्गमाझ लोकप्रिय हुँदै गएको बताए ।
यस खेलको खेलस्थल निर्माण÷भौतिक संरचना निर्माण नेपालमा आधिकारिकरूपमा यस संघको स्थापना भएपश्चात् यस खेलको खेलस्थल ९स्केटपार्क० को आवश्यकता महसुस गरी सन् २०१७ मा अमेरिकास्थित यस खेल विकासमा योगदान गर्दै आइरहेको ‘मेक लाइफ स्केट लाइफ’ संस्थाले काठमाडौंको ठमेलमा स्केटपार्क निर्माण गरेको थियो ।
त्यसपछि पोखरा रंगशालाभित्र तत्कालीन समयमा सन् २०१८ मा करिब एक करोडको लागतमा अन्तर्राष्ट्रियस्तरको स्केट पार्क निर्माण गरिदिएको र सो स्केटपार्कमा दुई वटा राष्ट्रिय च्याम्पियनसिप समेत सम्पन्न भइसकेको संघका अध्यक्ष अच्युत खनालले जानकारी दिए ।
त्यसैगरी बुटवलको तिलोत्तमामा अन्तर्राष्ट्रियस्तरको स्केटपार्क निर्माण भइसकेको छ भने काठमाडौं महानगरपालिकाले हालै मात्र काठमाडौं उपत्यकामा अन्तर्राष्ट्रियस्तरको स्केटपार्कको आवश्यकता महसुस गरी करिब सात करोड ५० लाख लागतको स्केटपार्क निर्माण गर्न सूचना प्रकाशित गरिसकेको छ ।
नेपालको राष्ट्रिय अन्तर्राष्ट्रियस्तरमा सहभागिता
सन् २०१६ मा नेपालले अन्तर्राष्ट्रिय स्केटिङ महासंघको सदस्यता हात पारेपछि २०१६ देखि हालसम्म नेपाललाई स्केटिङ खेलसँग आयोजना हुने विभिन्न अन्तर्राष्ट्रिय प्रतियोगिताहरू अन्तर्राष्ट्रिय कंग्रेसहरू तथा यस खेलसँग सम्बन्धित अन्तर्राष्ट्रिय फोरमहरूमा नेपालले निरन्तर सहभागिता जनाइरहेको छ ।
सन् २०१६ मा नेपाललाई स्केटबोर्डमा पहिलोपटक राष्ट्रिय खेलाडी मिलन शाह ठकुरीले थाइल्याण्डको राजधानी बैंककमा आयोजित एशियन प्लेट च्याम्पियनशीपको फ्रि स्टाइल स्केटबोर्ड विधामा प्रथम स्थान हासिल गर्न सफल भएका थिए ।
सन् २०१७ मा नेपालले चीनमा आयोजना भएको एसियन स्केटबोर्डिङ च्याम्पियनसिपमा दुई खेलाडी मिलन शाह र रोनित देउला र प्रशिक्षकमा उज्ज्वल डंगोलले सहभागिता जनाएको संघका सचिव सत्य थापाले जानकारी दिए ।
यसैगरी सन् २०१८ को एसियन गेम्समा नेपालले फ्रि स्टाइल स्केटबोर्ड विधामा सभागिता जनाउने अवसर पाएको र सो प्रतियोगितामा नेपालका तर्फबाट नेरिश थापाले प्रतिस्पर्धा गर्दै १०औं स्थान हासिल गर्न सफल भएका थिए ।
संघले वार्षिकरूपमा आयोजना गर्दै आइरहेको आफ्नो क्यालेण्डरअनुसारको जिल्ला, प्रदेश तथा राष्ट्रिय स्केटबोर्ड प्रतियोगितहरू नियमितरूपमा आयोजना गर्दै आइरहेको अध्यक्ष खनालले बताए । यसपटक पनि छैटौं राष्ट्रिय स्केटबोर्ड प्रतियोगिता यसै आर्थिक वर्षभित्र गरिसक्ने लक्ष्य लिएको उल्लेख गर्दै उनले करिब ४५ जिल्लामा खेलिँदै आइरहेको दाबी गरे ।
