काठमाडौं । भदौ महिनाको ३ दिनमै बैंकिंङ प्रणालीमा निक्षेप घटेको छ । भदौ महिनाको ३ दिनको अवधिमा वाणिज्य बैंकहरूको निक्षेप ७ अर्बले घटेको हो । बैंकर्स संघको तथ्यांक अनुसार साउन ३१ गते बैंकहरूको निक्षेप ४४ खर्ब ३३ अर्ब रहेकोमा भदौ ३ गते गतेसम्ममा बैंकहरुको निक्षेप ७ अर्बले घटेर ४४ खर्ब २६ अर्ब पुगेको छ ।
यस अवधिमा कर्जा प्रवाह भने १ अर्बले बढेको छ । संघका अनुसार साउन ३१ गते बैंकहरुको कर्जा प्रवाह ४१ खर्ब ७७ अर्ब रहेकोमा भदौ ३ गतेसम्ममा बैंकहरुको कर्जा प्रवाह १ अर्बले बढेर ४१ खर्ब ७८ अर्ब पुगेको छ । यस अवधिमा बैंकहरुको सिडी रेसियो ८८.४७ प्रतिशत रहेको संघले जनाएको छ ।
चालु आर्थिक वर्ष सुरु भएयता बैंकको निक्षेप १ खर्ब १५ अर्बले घटेको छ । असार ३२ गते बैंकहरूको निक्षेप ४५ खर्ब ४१ अर्ब रहेकोमा भदौ ३ गतेसम्मको अवधिमा बैंकहरुको निक्षेप घटेर ४४ खर्ब २६ अर्ब पुगेको हो ।
चालु आर्थिक वर्षको साउन महिनामा सञ्चालनमा रहेका २६ वटा वाणिज्य बैंकमध्ये २२ वटा वाणिज्य बैंकको निक्षेप घटेको छ । २२ बैंकको निक्षेप घटेसँगै ११ बैंकको कर्जा पनि घटेको छ ।
असार महिनाको तुलनामा साउन महिनामा सबैभन्दा बढी राष्ट्रिय वाणिज्य बैंकको निक्षेप घटेको छ भने ४ वटा बैंकको निक्षेप बढेको छ । राष्ट्रिय वाणिज्य बैंकको यो अवधिमा १५३२ प्रतिशतले घटेर २ खर्ब ४१ अर्ब ३१ करोडमा झरेको छ । असारअन्त्यसम्म बैंकको निक्षेप २ अर्ब ५६ अर्ब ६४ करोड रुपैयाँ रहेको थियो । साउन पछिल्लो सातामात्रै बैंकको निक्षेप पौन ३ प्रतिशतले घटेको हो । निक्षेप घटेपनि बैंकको कर्जा भने १.२६ प्रतिशतले बढेको छ ।
साउन महिनामा प्रभु बैंकको निक्षेप १२ प्रतिशतभन्दा बढीले घटेको छ भने नेपाल बैंक र एनसीसी बैंकको निक्षेप करिब ११ प्रतिशतले घटेको छ । कुमारी बैंकको निक्षेप ८.३६ प्रतिशतले घटेको छ भने कृषि विकास बैंकको नाफा ७.३० प्रतिशतले घटेको छ । निक्षेप घटेका बैंकमध्ये सिटिजन, सिभिल माछापुच्छे« बैंकको पनि ४ प्रतिशतभन्दा बढीले निक्षेप घटेको छ ।
सबै बैंकको निक्षेप घट्दा पनि नेपाल इन्भेष्टमेन्ट बैंकर एनआईसी एशिया बैंकको निक्षेप भने बढेको छ । एनआईसी एशिया बैंकले साउनमा १० प्रतिशतले भन्दा बढी निक्षेप बढाएको छ । उक्त बैंकले ‘सर्वश्रेष्ठ १० गुणा मुद्दती योजना’ बढी अफर भन्ने विशेष स्कीम ल्याएकोले निक्षेप बढेको हो ।
असार अन्त्यमा २ खर्ब ९४ अर्ब ९८ करोड रहेको निक्षेप साउन २७ गतेसम्म बढेर ३ खर्ब ५ अर्ब १३ करोड रुपैयाँ पुर्याएको छ । बैंकले साउनको २७ दिनमा १० अर्ब १५ करोड रुपैयाँ निक्षेप संकलन गरेको छ । योजना लागू भएदेखि बढ्दै गएको निक्षेप २७ दिनमा सो पुँजी बढेको हो । यो अवधिमा नेपाल एसबिआई बैंक र स्ट्याण्डर्ड चार्टड बैंकको पनि निक्षेप बढेको थियो ।
सिभिल, नबिल, नेपाल बैंक, एनसीसी, एनएमबि, प्राइम, स्ट्याण्डर्ड चार्टड, सनराइज, कृषि विकास बैंक र बैंक अफ काठमाडौंले कर्जा घटाएका छन् । यो अवधिमा एनसीसी बैंकको कर्जा र निक्षेप दुबै घटेको छ । ११ बैंक बाहेक १५ वटा बैंकको कर्जामा केहि सुधार आएको छ । असार महिनासम्म कर्जा ठप्प जस्तै पारेर बसेका वाणिज्य बैंकहरूले साउन लागेपछि भने कर्जामा केहि सुधार हुन थालेको देखिएको छ । पछिल्लो समय ठूलो पुँजीको कर्जा प्रवाह गर्न नसकेपनि मार्जिन कर्जा भने दिन थालेको बुझिएको छ ।
