काठमाडौं । असोज पहिलो हप्ता भएको आएको अविरल बर्षा र त्यसपछिको बाढी पहिरोबाट भएको क्षतिमा दावी भुक्तानी मंसिर २५ भित्र हुनपर्ने भएको छ । नेपाल बीमा प्राधिकरणले बीमा कम्पनीको सीईओहरुलाई बोलाएर निर्देशन दिएको हो ।
प्राधिकरणका अनुसार परेका दावीहरुमा मंसिर २५ गते भित्र भुक्तानी गरिसक्न भनिसकिएको छ । त्यसमा बीमा कम्पनीहरु सकरात्मक समेत रहेका छन् ।
प्राधिकरणका अध्यक्ष सूर्य सिलवाल भन्छन्, ‘सोमबार सबै बीमा कम्पनीको सीईओहरुलाई बोलाएर निर्देशन दिइसकिएको छ । अब उनीहरुले करिव १ महिना भित्र भुक्तानी प्रदान गर्नुपर्ने छ । र त्यसमा सकरात्मक समेत रहेका छन् ।’
कुनै ‘क्रिटिकल’ अवस्था आएको खण्डमा मात्रै बाँकी राख्ने अन्यथा भुक्तानी बाँकी नराख्न भनिएको छ ।
यद्दपी बीमा कम्पनीहरुले दावी रकम एकिन गर्दै भुक्तानी प्रदान गर्न भने थालिसकको देखिएको छ । नेपाल बीमा प्राधिकरणको तथ्याङ्क अनुसार बीमा दावी १० अर्ब ५३ करोड रुपैयाँ बराबरको रहेको छ ।
३ हजार ४ सय ६० वटा दावी संख्या रहेको छ । जसमा कात्तिक २० गतेसम्मको विवरण अनुसार ४७ करोड ११ लाख रुपैयाँ भुक्तानी भएको छ । त्यसमा सबैभन्दा धेरै शिखर इन्स्योरेन्सले मात्रै २५ करोड १९ लाख रुपैयाँ भुक्तानी गरेको हो । अन्य कम्पनीहरुले समेत विस्तारै भुक्तानी गर्न थालेको देखिएको छ ।
कुन कम्पनीको कति गरेको छ भुक्तानी ?
सिद्धार्थ प्रिमियर इन्स्योरेन्स ७ करोड ६७ लाख
दि ओरिएन्टल इन्स्योरेन्स ७ लाख २६ हजार
शिखर इन्स्योरेन्स २५ करोड १९ लाख
नेको इन्स्योरेन्स २ करोड ५१ लाख
हिमालयन एभरेष्ट ३ करोड ५५ लाख
सगरमाथा लुम्बिनी ४ करोड ३८ लाख
नेशनल इन्स्योरेन्स २२ लाख ५३ हजार
आइजिआई प्रूडेन्सियल १ करोड २५ लाख
एनएलजी इन्स्योरेन्स ५ लाख ६६ हजार
नेपाल इन्स्योरेन्स ९८ लाख ७७ हजार
सानिमा जीआईसी ७८ लाख २५ हजार
राष्ट्रिय बीमा कम्पनी शुन्य
प्रभु इन्स्योरेन्स ५१ लाख १२ हजार
युनाइटेड अजोड ५ लाख ४३ हजार
स्टार माइक्रो इन्स्योरेन्स २६ हजार
ट्रस्ट माइक्रो इन्स्योरेन्स शुन्य
नेपाल माइक्रो इन्स्योरेन्स २५ हजार
प्रोटेक्टिभ माइक्रो इन्स्योरेन्स शुन्य
