काठमाडौं । नेपाल टेलिकमले भोलि पुस २८ गतेदेखि लागू हुने गरी विन्टर अफर २०७९ उपलब्ध गराउने भएको छ। कम्पनीले पहिले उपलब्ध गराइरहेको अटम अफरलाई ग्राहकको रुचिअनुसार परिमार्जन गरी थप आकर्षक बनाएर विन्टर अफर उपलब्ध गराउन लागेको हो।
विन्टर अफरमा कम्पनीले उपलब्ध गराइरहेको सजिलो प्रिपेड कम्बो अफरलाई निरन्तरता दिइएको छ। यसमा कम्पनीका प्रिपेड मोबाइलका ग्राहकलाई १९९ रूपैयाँदेखि ६९९ रूपैयाँ सम्मका सुलभ दरका २८ दिनसम्म प्रयोग गर्न सकिने डाटा, भ्वाइस र सन्देशका विभिन्न प्याकहरु उपलब्ध छन्।
यस अफरअन्तर्गत जम्मा ६९९ रूपैयाँमा २८ दिनका लागि कुल २८ जीबी डाटा (दैनिक १ जिबी), दैनिक १०० मिनेट कुराकानी गर्ने र दैनिक १०० वटा सन्देश पठाउन सकिने सुविधा उपलब्ध रहेको छ।
यसैगरी ४९९ रूपैयाँमा २८ दिनका लागि कुल १९ हजार ६०० एमबी डाटा (दैनिक ७०० एमबी), दैनिक ७० मिनेटको भ्वाइस प्याक र ७० वटा सन्देश पठाउन सकिने सुविधा उपलब्ध छ। जम्मा ३४९ रूपैयाँमा उपलब्ध अर्को प्याक खरिद गर्दा २८ दिनका लागि कुल १४ जीबी डाटा (दैनिक ५०० एमबी), दैनिक ५० मिनेटको कुराकानी गर्ने र ५० वटै सन्देश पठाउन सकिने सुविधा उपलब्ध रहेको छ।
यसैगरी जम्मा १९९ रूपैयाँमा २८ दिनका लागि कुल ४२०० एमबी डाटा (दैनिक १५० एमबी), दैनिक १५ मिनेट कुराकानी गर्ने र १५ वटा सन्देश पठाउन सकिने सुविधा उपलब्ध छ। यस अफरअन्तर्गतका १९९ रूपैयाँदेखि ६९९ रूपैयाँ सम्मका कुराकानी गर्ने र सन्देश पठाउन सकिने प्याकहरु सबै नेटवर्कका लागि उपलब्ध छन्।
स्टे कनेक्टेड अफरअन्तर्गत यसअघि उपलब्ध प्याकलाई ग्राहकको चाहना बमोजिम थप सुलभ दरमा ल्याइएको छ। जम्मा १३० रूपैयाँमा ५ दिनका लागि २ जीबी सबै नेटवर्कमा र ४ जीबी फोरजी नेटवर्कमा प्रयोग गर्न सक्नेगरी जम्मा ६ जीबी डाटा सुविधा र १५० मिनेट सबै नेटवर्कमा कुरा गर्न सकिने प्याक उपलब्ध गरिएको छ। १०० रूपैयाँ र २०० रूपैयाँका स्टे कनेक्टेड अफरहरु निरन्तर प्रयोग गर्न सकिनेछ।
यसैगरी एफटीटीएच सेवामा वार्षिक ४० र ८० एमबीपीएस इन्टरनेट व्यान्डविथसहित आईपीटीभी र भ्वाइस सेवाको ट्रिपल प्ले प्याक थप सुलभ दरमा उपलब्ध गराइएको छ। अब ४० र ८० एमबीपीएस इन्टरनेट ब्यान्डविथसहितको ट्रिपल प्ले प्याक नवीकरण गर्दा क्रमशः जम्मा १६ हजार ६८२.६४ रुपैयाँमा र २१ हजार ५४१.५४ रुपैयाँमात्र लाग्दछ। एफटीटीएच सेवामा उपलब्ध गराइएका यसअघिका अरु सबै प्याकलाई निरन्तरता दिइएको छ।
पोस्टपेड कम्बो प्या अन्तर्गत उपलब्ध भइरहेको जम्मा ३७३ रूपैयाँ मा ३० दिनसम्म प्रयोग गर्न सकिने अन नेट ८०० मिनेटको भ्वाइस प्याक र ३७३ रूपैयाँमै ३० दिनसम्म प्रयोग गर्न सकिने ४ जीबी डाटा प्याकमा रेन्टल समाबेश गरी निरन्तरता प्रदान गरिएको छ।
सजिलो अनलिमिटेड पोस्टपेड प्याकअन्तर्गत ५९९, ७९९, ९९९ र १४९९ रूपैयाँका असीमित सुविधाहरु प्रयोग गर्न सकिने प्याकहरु निरन्तर उपलब्ध छन्। यसमा कम्पनीभित्रकै नेटवर्कमा असीमित कुराकानी गर्न सकिने र अन्य सेवा प्रदायक नेटवर्कमा २५० मिनेट कुराकानी गर्न वा दैनिक १ जीबी डाटा प्रयोग गर्न सकिने ३० दिनको ५९९ रूपैयाँको प्याक उपलब्ध छ।
यसका साथै ७९९ रूपैयाँमा कम्पनीभित्रकै नेटवर्कमा असीमित र अन्य सेवा प्रदायकको नेटवर्कमा ५०० मिनेट कुराकानी गर्न सकिने, अल नेट २०० वटा सन्देश पठाउन सकिने र प्रतिदिन १ जीबी डाटा ३० सम्म चलाउन सकिन्छ।
९९९ रूपैयाँ र १४९९ रूपैयाँका ३० दिन समयावधि भएका प्याकमार्फत कम्पनीभित्र र बाहिरको नेटवर्कमा पनि असीमित कुराकानी (अल नेट अनलिमिटेड) गर्न सकिनुका साथै क्रमशः प्रतिदिन २ जीबी र ४ जीबी डाटा तथा ४०० वटा र १००० वटा अल नेट सन्देश पठाउन सकिने सुविधा उपलब्ध छ।
यीबाहेक पहिलेदेखि नै उपलब्ध अफरलाई निरन्तरता दिइएको छ। अफर प्राप्त गर्नका लागि ग्राहकले *1415# डायल गर्नुपर्नेछ। कम्पनीको ‘नेपाल टेलिकम’ एपबाट यससम्बन्धी जानकारी लिन तथा सेवा खरिद गर्न सकिन्छ।
त्यसैगरी कम्पनीको वेबसाइट www.ntc.net.np मार्फत विस्तृत जानकारी प्राप्त गर्न सकिन्छ।
कम्पनीले ग्राहकको सुविधाका लागि उपलब्ध गराएको विन्टर अफर थप आकर्षक हुने विश्वास कम्पनीको रहेको छ।
