काठमाडौं । नेपाल दूरसञ्चार कम्पनी लिमिटेड (नेपाल टेलिकम)का कर्मचारीको आन्दोलन स्थगित भएको छ । कर्मचारी विनियामवली २०७८ को विरोधमा टेलिकमका नेपाल दूसरसञ्चार राष्ट्रिय कर्मचारी संगठन, नेपाल टेलिकम वकर्स युनियन, नेपाल टेलिकम कर्मचारी युनियन संयुक्त साउन ५ गतेदेखि आन्दोलनमा थिए ।
टेलिमकको व्यवस्थापन पक्ष र कर्मचारी ट्रेड युनियनहरुबीच शुक्रबार अबेर राती सहमति भएसँगै आन्दोलनको कार्याक्रम स्थगन भएको हो । ट्रेड युनियन र व्यवस्थापनबीच २९ बुँदे सहमति भएको छ । विभिन्न पक्षमा भएको छलफल र कर्मचारी विनियमावलीमा आवश्यक संशोधन गर्न सिफारिस गर्ने सहमतिका साथ आन्दोलन रोकिएको हो ।
ट्रेड युनियनले साउन ५ गते टेलिकमका प्रबन्ध निर्देशक डिल्लीराम अधिकारीलाई रातभर केन्द्रीय कार्यालयमा थुनेर आन्दोलन शुरु गरिएको गरे थिए ।
कर्मचारी ट्रेड युनियनले यसअघि भएको कर्मचारी विनियमावलीमा संशोधनको विषयलाई लिएर आन्दोलन गर्दै आएका थिए । जसमा ट्रेड युनियनमा सहभागी हुने तह परिवर्तन गरिएको, प्रबन्धक भइसकेको कर्मचारी दुई तह घटेर कम्पनीमै काम गर्नसक्ने जस्ता प्रावधानमा उनीहरूले आपत्ति जनाउँदै आएका थिए ।
जसका कारण पछिल्लो ३९ दिनदेखि कर्मचारी युनियनले बिहान १० बजे कार्यालयअघि धर्ना शुरु गर्ने र बेलुका ५ बजे ताली पिट्दै अर्को दिन यस्तै प्रक्रियालाई निरन्तरता दिँदै आएका थिए ।
यो बीचमा सञ्चार तथा सूचना प्रविधि मन्त्रालयले एक टोली समेत गठन गरेर छलफलका लागि सहजीकरण गर्दै आएको थियो । यसबीच नवनियुक्त सञ्चार सचिव डा. वैकुण्ठ अर्यालको पहलमा टेलिकम व्यवस्थापन र ट्रेड युनियनबीच २९ बुँदे सहमति भएको हो ।
सहमतिमा उल्लेख भएका धेरैजसो विषय यसअघि नै टेलिकमको बोर्डमा प्रस्तुत भएका विषय छन् । जसमा पहिलो भने ११ तहमा पाँच वर्ष र १० तहमा ८ वर्ष सेवा अवधि पुगेपछि स्वतः अवकाश हुने व्यवस्था काय गर्नेगरी कर्मचारी विनियमावली २०७८ संशोधन गर्न उल्लेख गरिएको छ ।
त्यस्तै कम्पनीको कुनै कर्मचारी कम्पनीको प्रबन्ध निर्देशक पदमा नियुक्त भए नियुक्त भएको मितिदेखि कम्पनीको सेवाबाट स्वतः अवकाश हुने व्यवस्थासमेत कायम गर्नेगरी संशोधनका लागि लोक सेवा आयोगमा लेखी पठाउने सहमति भएको छ ।
यसका साथै कम्पनीमा बहालवाला स्थायी कर्मचारीहरूलाई खुल्ला प्रतियोगितात्मक परीक्षामा सम्मिलित हुन उमेरको हद नलाग्ने व्यवस्था लगायतका विषयमा सहमति भएको छ ।
