काठमाडौं । पेट्रोलियम पदार्थको मूल्य घटेर आएको छ । भारतीय आयल कर्पोरेसन (आईओसी)ले नेपाल आयल निगमलाई पेट्रोलियम पदार्थको मूल्य घटाएर पठाएको हो ।
नयाँ मूल्यसूचीअनुसार पेट्रोल प्रतिलिटर ६ रुपैयाँ ५५ पैसा र डिजल प्रतिलिटर ४४ पैसा मात्रै घटेर आएको छ ।
हवाइ इन्धनको मूल्य प्रतिलिटर १ रुपैयाँ ५० पैसाका दरले घटेको छ ।
नयाँ मूल्य अनुसार पेट्रोलको नाफा प्रतिलिटर ८ रुपैयाँमा सीमित भएको छ । त्यस्तै, डिजलबाट हुने नोक्सानी बढेर प्रतिलिटर ५ रुपैयाँ पुगेको छ । शुक्रबारको मूल्य अनुसार निगमको मासिक नोक्सानी करिब २० करोड पुग्नेछ । आईओसीले हरेक १५/१५ दिनमा नयाँ मूल्यसूची पठाउने गरेको छ ।
सोही मूल्यको आधारमा निगमले उपभोक्ता मूल्य तोक्नेछ । यसअघि ३ पटकसम्म मूल्य घटेर आए पनि निगमले नेपालमा घटाएको थिएन । यो समेत गरेर भारतबाट चौथोपटक इन्धनको मूल्य घटेर आएको हो ।
हाल नेपालमा पेट्रोलको मूल्य प्रतिलिटर १८१ रुपैयाँ र डिजेलको मूल्य प्रतिलिटर १७८ रुपैयाँ कायम रहेको छ ।
