काठमाडौं । नबिल बैंकको सहयोगमा ‘डिजिटल साक्षरता अभिवृद्धि’ सम्बन्धी तालिम सम्पन्न भएको छ । उक्त कार्यक्रमम २५ जना गृहिणी महिला दिदीबहिनीहरूको सहभागिता रहेको थियो । काठमाडौ महानगरपालिका वडा नं. ५ मा ३ दिनसम्म सञ्चालन भएको उक्त तालिमबाट प्रशिक्षार्थीहरूले मोबाइल बैंकिङका साथै विभिन्न वालेटमार्फत दैनिक उपभोग्य सामग्री खरिददेखि धारा, बत्ती, फोन, स्कूल तथा कलेजको शुल्क तिर्न सिक्नुका साथै डिजिटल्ली पैसा भुक्तानी गर्न सिकेका हुन् । उक्त तालिमको आयोजना त्रिशक्ति महिला समूहले गरेको थियो ।
कार्यक्रममा बोल्दै काठमाडौं महानगरपालिका वडा.नं–५ का वडा अध्यक्ष विरेन्द्र प्रजापतीले नबिलले दिदीबहिनीलाई सिकाएको यो ज्ञानलाई पूर्ण रुपमा अभ्यास गर्नको लागि आफ्नो आयस्रोत पनि बढाउनु पर्ने बताए । ‘म वडामा उद्यमशीलताको विकास गर्न चाहन्छु’, उनले भने ‘पैसाको कारोबार गर्नको लागि आयआर्जन हुने बाटो तय गर्दैछु ।’
बिजुली तथा खानेपानीको बिल मोबाइल बैंकिङ वा वालेटमार्फत् तिर्नुस्, महिनामा एकपल्ट भएपनि अभ्यस्त बनाउँछ । डिजिटल युगमा टिकट काट्ने, बुकिङ गर्ने र किनमेल गर्दा पनि अनलाइनबाटै रकम तिर्ने बानीले जीवन सहज बनाउँछ । साथै सबै जना सचेत बन्नुपर्छ । मोबाइल र पासवर्ड सुरक्षित राख्नुपर्छ । जो कोहीको विश्वास गर्नु हुँदैन । आगामी दिनमा थप यस्तो कार्यक्रम गर्दै जाने र अरुलाई पनि सिकाउँदै जानुपर्छ ।
कार्यक्रममा कामपा–५ का निवर्तमान वडा अध्यक्ष रमेश डंगोलले डिजिटल युगमा वित्तीय शिक्षाको महत्व भएको बताए । ‘अहिले मोबाइल चलाउँदा सबै कुरा त्यसैभित्र छ’ उनले भने ‘आफूले प्रयोग गर्नु र आफूले सिकेको ज्ञान घरका सदस्यलाई पनि सिकाउनु पर्छ ।’
डिजिटल साक्षरता कार्यक्रममा नेपाल राष्ट्र बैंक उप निर्देशक सुधा श्रेष्ठले वित्तीय साक्षरताका डिजिटल ठगीबाट हुने ठगीबाट बच्ने उपायका वारेमा प्रशिक्षण दिएकी थिइन । ‘महिला दिदी बहिनीहरूले तालिमबाट सिकेको ज्ञान दैनिक प्रयोगमा ल्याउनुपर्छ’, उनले भनिन् ‘एक पटक सिकेको ज्ञान अभ्यास नभए हामीले बिर्सिदै जान्छौं ।’
‘तालिममा सिकेको ज्ञान व्यवहारमा उतार्नु हुन्छ भन्ने मैले अपेक्षा गरेको छु’, उनले भनिन् ‘डिजिटल कारोबार गर्दा हामी सचेत भएनौ भने जोखिम पनि निम्तन सक्छ, त्यसका लागि जोगिएर कारोबार गर्नुपर्छ ।’ अब कुनै पनि भुक्तानी गर्दा मोबाइलबाटै भुक्तानी गर्नु हुन्छ भन्ने मैले विश्वास लिएको छु ।’
नबिल बैंकको प्रतिनिधि तथा प्रशिक्षक दिलबहादुर खड्काले पनि कार्यक्रममा सिकेको विषय दैनिक जीवनमा उपयोग गर्ने विश्वास गरे ।
