काठमाडौं । मुक्तिनाथ विकास बैंकले गत आर्थिक वर्षको असार मसान्तसम्म बैंकले एक अर्ब ३६ करोड ३८ लाख रुपैयाँ खुद नाफा कमाएको छ । यो अघिल्लो आर्थिक वर्षको सोही अवधिको तुलनामा १.६४ प्रतिशत बढी हो । अघिल्लो आर्थिक वर्षको सोही अवधिसम्ममा बैंकले एक अर्ब ३४ करोड १८ लाख रुपैयाँ खुद नाफा कमाएको थियो । बैंकको इम्पेरमेन्ट चार्ज बढेपछि खुद नाफामा केही दबाब पुगेको देखिन्छ ।
समीक्षा अवधिमा बैंकको खुद ब्याज आम्दानी २३.५७ प्रतिशत बढेको छ भने बैंकको सञ्चालन आम्दानी झिनो अर्थात २.२४ प्रतिशतले बढेको छ । सो अवधिसम्ममा बैंकको इम्पेरमेन्ट चार्ज ५५ करोड २२ लाख रुपैयाँ रहेको छ ।
गत आर्थिक वर्षको अन्त्यसम्ममा बैंकको वितरणयोग्य मुनाफा घटेको छ । यस अवधिमा बैंकको वितरण योग्य मुनाफा ६४ करोड ४० लाख रुपैयाँ रहेको छ । यस अनुसार बैंकको लाभांश क्षमता १०.०३ प्रतिशत रहेको छ ।
बैंकको नाफामा संकुचन आए सँगै बैकको प्रतिसेयर आम्दानीमा गिरावट भएको छ । प्रकाशित वित्तीय विवरण अनुसार बैंकको प्रतिसेयर आम्दानी २३ रुपैयाँ ७२ पैसाबाट घटेर २१ रुपैयाँ २४ पैसामा झरेको छ । बैंकको प्रतिसेयर नेटवर्थ १४७ रुपैयाँ छ ।
६ अर्ब ४२ करोड रुपैयाँ चुक्ता पूँजी रहेको यस बैंकको जगेडा कोषमा दुई अर्ब ३७ करोड ३७ लाख लाख रुपैयाँ सञ्चित छ । समीक्षा अवधिमा बैंकको निक्षेप ११.२५ प्रतिशत बढेको छ भने कर्जा लगानी ९.१५ प्रतिशत बढेको छ ।
