७ महिनामा कमिशन वापत नै बैंकहरूले कमाए करिब १५ अर्ब (कुन बैंकको कमाइ कति ?)

काठमाडौं । बैंक तथा वित्तीय संस्थाले कमाइ के केबाट हुन्छ त ? हामी सहजै आम्दानीको स्रोत खोतल्न सक्छौं । बैंक तथा वित्तीय संस्थाले विभिन्न शीर्षकबाट गर्ने कमाइमध्ये कमिशन तथा छुट पनि एक हो । बैंक तथा वित्तीय संस्थाहरूले चालु आवको साउनदेखि माघ महिनासम्म कमिशन वापत १४ अर्ब ८९ करोड ७० लाख रुपैयाँ कमाएका छन् ।

गत आवको सोहि अवधिमा बैंक तथा वित्तीय संस्थाको यस्तो कमाइ १५ अर्ब ७०करोड रुपैयाँ थियो । गत आवको पुसको भन्दा माघमा बैंक तथा वित्तीय संस्थाको कमाइ १३.१२ प्रतिशतले बढेको थियो । यो आर्थिक वर्षको सोही अवधिमा भने यस्तो कमाइ १६.८८ प्रतिशतले बढेको छ ।

बैंकहरूले कुनै पनि सेवा प्रदान गर्दा लिने कमिशन वा छुट वापत सो रकम कमाइ गरेको राष्ट्र बैंकको तथ्यांकमा उल्लेख गरिएको छ । पुस महिनासम्म यस्तो कमिशन वापत बैंक तथा वित्तीय संस्थाहरूले १२ अर्ब ७६ करोड रुपैयाँ आम्दानी गरेका थिए । गत आर्थिक वर्ष भरिमा बैंक तथा वित्तीय संस्थाहरूको यस्तो कमाइ २७ अर्ब २५ करोड रुपैयाँ थियो ।

बैंक तथा वित्तीय संस्थाले सेवाग्राहीलाई दिएको छुट तथा कमिशनवापतको कमाइमा ठूलो हिस्सा वाणिज्य बैंकहरूको रहेको छ । वािणज्य बैंकहरूले चालु आवको यो अवधिमा १४ अर्ब ३२ करोड रुपैयाँ कमाइ गरेका छन् । गत आवको सोहि अवधिमा वाणिज्य बैंकहरूको यस्तो कमाइ १४ अर्ब ४१ करोड रुपैयाँ थियो ।

विकास बैंकहरूले भने चालु आवको माघमहिनासम्म ४८ करोड ५० लाख रुपैयाँ कमाएका छन् । गत आवको सो अवधिमा उनीहरूको यस्तो कमाइ ६३ करोड रुपैयाँ थियो । विकास बैंकले कमिशन वापत ८ करोड ९० लाख रुपैयाँमात्रै कमाएको छ । गत आवका सोही अवधिमा फाइनान्स कम्पनीहरूले १५ करोड २० लाख रुपैयाँ कमिशन वापत कमाएका थिए ।