काठमाडौं । नागरिक लगानी कोषले ३० प्रतिशत बोनस सेयर र १.५७८९ प्रतिशत नगद लाभांश दिने भएको छ । कोषको २७ औं वार्षिक साधारणभाले उक्त बोनस र लाभांश दिने निर्णय गरेको हो । सभाले आर्थिक वर्ष २०७७/७८ को आम्दानी बाँडफाँट हिसाव विवरणमा छुट्याएको प्रस्तावित बोनस साधारणसभाले पारित गरेको हो ।
आव २०७७/७८ को वार्षिक प्रतिवेदन माथि छलफल गरी पारित गरेको छ । यो सँगै लेखापरीक्षकको प्रतिवेदन सहितको २०७८ असार मसान्तको वासलात, नाफा नोक्सान हिसाव र नगद प्रवाह विवरणमा छलफल गरी पारित गरेको छ । सभामा कोष संचालक समितिका अध्यक्ष प्राडा थापाले कोषले संचालन गरिरहेको सरकारी, गैर सरकारी एवं नीजि प्रतिष्ठामा नसमेटिएका अन्य क्षेत्रका नेपाली नागरिकहरुलाई सामाजिक सुरक्षाको प्रत्याभूति सहितको बचत कार्यक्रमले समेटने धारणा राखे ।
उनले कोषले संकलन गरेको बचत रकमलाई राष्ट्रिय गौरवका आयोजनाहरू, पूर्वाधार विकास तथा उत्पादनमूलक क्षेत्रहरु, सहभागीहलाई सहयोग पुग्ने गरी विभिन्न ऋण सापटीहरु एवं पुँजीबजारका विकास गरी लगानी विविधिकरण गरी प्रतिफल अभिवृद्धि गर्न सकिने अवसरहरुको बारेमा जोड दिए ।
उनले कोषमा विद्यमान सम्भावना तथा अवसरको उपयोग गर्दे समस्या एवम् चुनौतीहरुलाई समाधान गरी लगानीको विविधीकरण गर्दे उत्पादनशील क्षेत्रमा लगानी गरी कोषलाई नाफामूलक बनाउने प्रतिवद्धता व्यक्त गरे ।
कार्यक्रममा कोषका कार्यकारी निर्देशक रमण नेपालले कोषको वस्तुस्थिति बारे जानकारी दिए । उनले सेयरधनीले राखेको जिज्ञासालाई सम्बोधन पनि गरे । आर्थिक वर्ष २०७८/७९ को असार मसान्तसम्म कोषको खुद कोष मौज्दात रकम २ खर्ब १७ अर्ब ३२ करोड २२ लाख रुपैँया पुगेको छ । उक्त अवधिमा कोषले १ खर्व ९४ अर्व ९२ करोड लगानी गरेको छ ।
कोषले कारोबार विस्तार गर्न स्वरोजगार र वैदेशिक रोजगारमा रहेका नागरिकलाई आबद्ध गराउने तर्फ काम गरिरहेको छ । कोषद्वारा संचालित सम्पूर्ण कार्यक्रममा एनएलके वेभ बेष्ड सफ्टवेयर पूर्ण रुपमा लागू गरिएको छ । साधारणभाले कोष संचालक समितिका अध्यक्ष प्राडा.सूर्य बहादुर थापाको अध्यक्षतामा सम्पन्न गरेको छ ।
साथै, सरकारी लेखा प्रणाली (सिगास) सफ्टवेयरमा डाटा लिने कार्य सम्पन्न भएको छ । नयाँ सफ्टवेयर प्रयोगको लागि आवश्यक उपकरणहरु कोषको प्रणालीमा जडान गरि सकिएको छ । यो संगै कोषमा आवद्ध भएका विभिन्न प्रतिष्ठान, संघ, संगठनहरुबाट रकम संकलन गर्ने कार्य अनलाइन प्रणालीबाट गर्ने व्यवस्था भइसकेको छ । सभामा सर्वसाधारण सेयरधनीको तर्फबाट संचालकमा अशोक बुढाथोकी निर्विरोध निर्वाचित भएका छन् ।
