काठमाडौं । नेपाली अटोमोबाइल व्यवसायीहरुको छाता संगठन नाडा अटोमोबाइल्स एसोसिएसन अफ नेपालको आयोजनामा नेपालमै पहिलोपटक इलेक्ट्रिक गाडी तथा टु-ह्विलर ‘नाडा ईभी एक्सपो’ काठमाडौंको भृकुटीमण्डमा बिहीबारदेखि सुरु भएको छ। एक्सपो असोज ९ गतेसम्म सञ्चालन हुनेछ।
नाडा ईभी एक्सपो चलिरहेकै समयमा आज असोज ७ गतेदेखि असोज ९ गतेसम्म प्रत्येक दिन दिउँसो २ बजेदेखि अपराह्न ४ बजेसम्म यूएसएडको सहकार्यमा नाडा चौतारी सेमिनार पनि सञ्चालन हुने भएको छ। तीन दिनसम्म चल्ने सेमिनारमा विभिन्न क्षेत्रका इलेक्ट्रिक भेइकलसम्बन्धी चासो राख्ने विज्ञहरुको सहभागिता रहनेछ।
ईभी चौतारीको पहिलो दिन असोज ७ गते ईभी टेक्नोलोजी एन्ड इकोसिस्टमका बारेमा छलफल हुनेछ भने दोस्रो दिन असोज ८ गते फाइनान्सियल एसेप्ट्स अफ ईभीका बारेमा विभिन्न विज्ञहरुले आ–आफ्नो धारणा राख्नेछन्। अन्तिम दिन असोज ९ गते ‘पोलिसिज फर प्रमोटिङ ईभिज’ भन्ने विषयमा छलफल हुनेछ।
यो कार्यक्रमले नेपालमा इलेक्ट्रिक गाडीहरुको पोलिसी तहमा कार्य गर्ने नीतिनियमदेखि लिएर यसका प्रयोगकर्ता, वातावरणविद तथा इलेक्ट्रिक टेक्नोलोजी र नेपालमा यसको उपयोग सम्बन्धमा चासो राख्ने सबैलाई एक स्थानमा जम्मा गरी ज्ञान बाँड्ने चौतारी हुनेछ। कार्यक्रममा उपस्थितिका लागि नाडा अटोमोबाइल्स एसोसिएसन अफ नेपालले सबैलाई सहभागिताका लागि अनुरोध गरेको छ।
