तनहुँ । सबैको लघुवित्त वित्तीय संस्था लिमिटेडले संस्थाका आफ्ना ३५ जना ग्राहक सदस्यहरुको सहभागितामा जेष्ठ २४ गतेदेखि २६ गतेसम्म सप्तरी जिल्लाको राजविराज नगरपालिका–३, राजविराजमा ‘व्यवसायिक तरकारी खेती तालिम’ सम्पन्न गरेको छ । । यस तालिममा प्रशिक्षक सन्तोष सेन चौधरी, पवन कुमार श्रेष्ठ, दिप कुमार चौधरी, सञ्जय चौधरी रहेका थिए ।
करेसाबारीको परिचय, महत्व साथै तरकारीको नर्सरी बनाउने तरिका, हिउँदे तरकारी खेती प्रविधि, फल तरकारी खेती प्रविधि, लहरे खेती प्रविधि जरे तरकारी खेती प्रविधि, कोसे तरकारी खेती प्रविधि, तरकारी खेतीमा मलखादको प्रयोग, सिंचाई तथा ब्यवस्थापन, साग वाली खेती र बेमौसमी तरकारी खेती प्रविधि, तरकारी वालीमा लाग्ने रोग तथा किराहरुको जानकारी तथा विषादी ब्यवस्थापन, तरकारी वालीमा उचित पोष्ट हार्भेष्ट, बेचबिखन (कसरी मूल्य पार्ने) तथा बजार ब्यवस्थापन,संस्थाले प्रदान गरेको सेवाहरु, बचतको महत्व र बचतका प्रकारहरु, वित्तीय साक्षरता, ब्यवसायिक स्किमहरु आदि बारेमा यस तालिममा सहभागीहरुले जानकारी हासिल गरेका छन् ।
संस्थाले पाँच वर्षदेखि निरन्तर लघुवित्त सेवा प्रदान गरी रहेको यस संस्थाबाट कर्जा लिई व्यवसाय गरी धेरै घरपरिवार आर्थिक समुन्नततिर अगाडि बढेको बारेमा पनि जानकारी गराएका थिए ।
तालिमको दोश्रो दिन तालिममा सहभागीहरुलाई हनुमाननगर कंकालिनी नगरपालिका-६, अण्डिपट्टिको १४ जना पुरुष र ७ जना महिला गरी २१ जना मिलेर स्थापना भएको सप्तऋषि कृषक समूहका सदस्य तथा स्थानीय ब्यवसायिक कृषक देवेन्द्र नारायण साहको करिब साढे डेढ विघाहामा फैलिएको कृषि फार्म अवलोकन गराईएको थियो ।
संस्थाको तोपाबजार शाखाका प्रमुख सञ्जय चौधरीले तालिममा सहभागीहरुलाई स्वागत गर्दै स्वागत मन्तब्य राखेका थिए । तालिमको उद्देश्य बारेमा संस्थाका बर्दिबास मुकामका सुपरीवेक्षण अधिकृत दिप कुमार चौधरीले प्रकाश पारेका थिए ।
यो सबैको लघुवित्त वित्तीय संस्था लिमिटेडले ७ प्रदेश, ४३ जिल्लाहरुमा ९० शाखा कार्यालयहरु, ५ मुकाम कार्यालय र केन्द्रीय कार्यालय गरी ९६ कार्यालयहरुको सञ्जालहरु मार्फत संस्थाले लघुवित्त सेवा प्रदान गर्दै आई रहेको छ ।
संस्थाले ग्रामीण क्षेत्रमा बसोबास गर्ने गरीब, विपन्न परिवारका महिलाहरुलाई समूहमा आवद्ध गराई विना धितोमा कर्जा लगानी गर्नुका साथै सीपमूलक तालिम, वित्तीय साक्षरता तालिम कार्यक्रमहरु सञ्चालन गर्दै ग्राहक सदस्यहरुको आर्थिक, सामाजिक, बौंद्धिक विकास गर्दै आई रहेको छ ।
यस संस्थाले देशको ग्रामीण क्षेत्रलाई प्राथमिकता दिई शाखाहरु स्थापना गरी सदस्यहरुलाई आवश्यकतानुसार लगानी गर्दै आई रहेको छ । संस्थाले २०७९ बैशाख मसान्तसम्ममा ७३ हजार ६०० घरपरिवारहरुमा सेवा विस्तार गरेको छ । संस्थाले २०७९ बैशाख मसान्तसम्ममा लगानीमा रहेको कर्जा ४ अर्ब ५३ करोड ३६ लाख रहेको छ भने ग्राहक सदस्यहरुको १ अर्ब २५ करोड ९७ लाख बचत परिचालन गरेको छ ।
तालिमको मूल्याकंन गर्दै सहभागीहरु सुलेखा देवी झा, सविता तामाङ, सिता देवी यादव, देवेन्द्र नारायण साहले मन्तब्य राखेका थिए । ब्यवसायिक रुपमा तरकारी उत्पादन गरेको खण्डमा तरकारी खेतीबाट पनि मनग्य फाईदा लिन सकिने रहेछ, ब्यवसायिक रुपमा तरकारी खेती गर्नमा यस तालिम फलदायि हुने सहभागीहरुले बताएका थिए । सहभागीहरुले तालिममा सिकेका ज्ञान, सीप ब्यवहारमा उतार्ने प्रतिवद्धता ब्यक्त गरेका थिए ।
संस्थाले ग्राहक सदस्यहरुलाई वित्तीय सेवाहरुका साथसाथै ग्राहक सदस्यहरुको क्षमता अभिवृद्धि गराउन तथा ब्यवसायिक रुपमा ब्यवसाय सञ्चालन गर्न सघाउ पु¥याउन विभिन्न किसिमका सीप विकास तालिम सञ्चालन गरी रहेको छ ।
संस्थाले यस आर्थिक वर्षमा संस्थाका आफ्ना ग्राहक सदस्यहरुलाई विभिन्न किसिमका सीप विकास तालिमहरु सञ्चालन गर्दैं जाने लक्ष्य रहेको बारेमा संस्थाका नायब महाप्रवन्धक पवन कुमार श्रेष्ठले जानकारी गराएका थिए । तालिमको अन्त्यमा तालिममा सहभागीहरुलाई प्रमाणपत्र पनि वितरण गरिएको थियो । तालिमको सञ्चालन सप्तरी जिल्ला स्थित तोपाबजार शाखाका कनिष्ठ सहायक रुपक कुमार झाले गरेका थिए ।
