काठमाडौं । काठमाडौं महानगरपालिकाले किम्ची फास्टफुड रेष्टुरेन्टलाई जरिवाना गरेको छ । सिल गरेको प्रशोधित पानीको बोतलभित्र कीरा फेला परेपछि महानगरले किम्चीलाई २ लाख रुपैयाँ जरिवाना गरेको हो ।
किम्ची फास्टफुडमा आयोजना गरिएको एक कार्यक्रममा वडा नं. ११ का वडा सदस्य यशोमती परियारले बोतल खोलेर गिलासमा खन्याएर पिउन थालेपछि पानीमा कीरा सल्वलाएको देखेकी थिइन् ।
परियारले कार्यक्रममा उपस्थित महानगरपालिकाका उपप्रमुख सुनिता डंगोललाई पानीको बोतल देखाइन् ।
त्यसपछि अनुगमन समितिका संयोजकसमेत रहेकी उपप्रमुख डंगोलले दुषित पानी बिक्री गर्नेलाई तत्काल कारवाही गर्न निर्देशन दिएकी थिइन् ।
सोहि अनुसार काठमाडौं महानगरपालिकाले किम्ची फास्टफुडलाई जरिवाना गरेको हो ।
