काठमाडौं । संघीय मामिला तथा सामान्य प्रशासनमन्त्री भानुभक्त जोशीले नेपालको सामुदायिक वन र रेडियोले दक्षिण एसियामै उत्कृष्ट काम गरेको भन्दै यसलाई अझै व्यवस्थित र प्रभावकारी बनाउँदै जानुपर्ने बताए ।
नेपाल वातावरण पत्रकार समूहद्वारा सञ्चालित रेडियो सगरमाथाको २८औँ स्थापना दिवसका अवसरमा आज यहाँ आयोजित ‘डिजिटल युगमा समृद्ध समाज तथा राष्ट्र निर्माणका लागि सामुदायिक रेडियोको भूमिका’ विषयक कार्यक्रममा उनले सामुदायिक रेडियोले सबैको आशा, भरोसालाई जीवित राख्दै समृद्ध समाज र समृद्ध राष्ट्र निर्माणमा महत्वपूर्ण भूमिका निभाएको भन्दै धन्यवाद व्यक्त गरे ।
‘नमूनायोग्य काम गरेर सञ्चार सेवा प्रवाह गर्ने देशभरका चार सय वटा रेडियोका संस्थापकलाई म हार्दिक धन्यवाद तथा आभार व्यक्त गर्न चाहन्छु ।
निकै अप्ठ्यारोकाबीच पनि समुदायमा जसरी स्थापित हुनुभएको छ, समाजमा भएका हाम्रा सभ्यता, संस्कृतिहरु र चालचलनलाई जगेर्ना गर्दै सबै जनतालाई सचेत पारेर समृद्ध राष्ट्र निर्माणमा पु¥याउनुभएको योगदान अतुलनीय छ’, मन्त्री जोशीले भने ।
बागमती प्रदेश सञ्चार रजिष्ट्रार कार्यालयका रजिष्ट्रार रेवतीप्रसाद सापकोटाले सूचना प्रविधिको विकाससँगै रेडियो र यसबाट उत्पादित सामग्रीलाई पनि विश्वव्यापीकरण गरेको बताए । उनले मिडियाको संरक्षणसँगै पत्रकारको संरक्षणका लागि पनि सहज हुने गरी सञ्चार संस्था सञ्चालकलाई समेत रजिष्ट्रार कार्यालयले सहयोग गर्दै आएको बताए ।
उनले स्थानीय विषयवस्तु र सन्दर्भ सामग्रीलाई विश्वव्यापी रुपमा प्रचारप्रसार गरेर प्रभावकारिता अभिवृद्धि गर्नुपर्नेमा जोड दिए । उनले सञ्चार माध्यम सञ्चालनका लागि अनुमति लिन सेवाग्राहीले दुःख पाउने अवस्था सृजना गरिनुनहुने धारणा राखे ।
नेपाल वातावरण पत्रकार समूहकी अध्यक्ष रोशनी अधिकारीले लामो आरोहअवरोह पार गर्दै आगामी दिनहरुमा पनि सबैको साथ सहयोग सहकार्य रहने विश्वास व्यक्त गरे ।
सामुदायिक रेडियो प्रसारक संघका अध्यक्ष अर्जुन गिरीले देशभर तीन सय ७५ वटा सामुदायिक रेडियोले द्वन्द्वकालका साथै महामारीको समयमा पनि जनविश्वास जितेर काम गरेको बताए ।
अब बन्ने सञ्चारसम्बन्धी कानुन समुदायिक रेडियोमैत्री हुने धारणा राखे । उनले नेपालको राजनीतिक, सामाजिक परिवर्तन र रुपान्तरणमा सामुदायिक रेडियोले खेलेको भूमिका अतुलनीय रहेको भन्दै अझै पनि सामाजिक रुपान्तरणमा महत्वपूर्ण भूमिका खेल्न सक्ने बताए ।
अमार्क एसिया प्यासिफिकका उपाध्यक्ष सुवास खतिवडाले रेडियोको औचित्यता अहिले पनि समाजमा रहेको भन्दै सूचनाको माध्यममध्ये यो विश्वासनीय र समुदायको रुचि र चाहनालाई प्रकट गर्ने उपयुक्त माध्यम भएको बताए । उनले रेडियोमार्फत समुदायको सहभागिता र सक्रियतालाई ध्यान दिइनुपर्ने बताए ।
रेडियोले इन्टरनेटको पहुँच नपुगेको ठाउँमा सूचना तथा सन्देश प्रवाहमा महत्वपूर्ण भूमिका निर्वाह गरेको बताए ।
रेडियो सगरमाथा सञ्चालक समितिका अध्यक्ष घमराज लुइँटेलले रेडियोले विभिन्न समयमा सङ्घर्षका चरण पार गर्दै लोकतान्त्रिक परिवेश निर्माणका लागि रेडियोले अनवरतरुपमा सशक्त भूमिका निर्वाह गरेको बताए ।
सामाजिक सञ्चारमा फैलिने गलत सूचनाको कारण मानिसलाई गुमराहमा राख्ने अवस्था आएको भन्दै स्वतन्त्र सामुदायिक रेडियोको आवश्यकता रहेको जानकारी दिए ।
सञ्चारिका समूहकी पूर्वअध्यक्ष नितु पण्डितले रेडियो सगरमाथाले समाजलाई पु¥याएको योगदानको स्मरण गर्दै महिलाहरुको आवाजलाई बुलन्द पार्न र उनीहरुलाई नेतृत्वमा स्थापित गर्न महत्वपूर्ण भूमिका निर्वाह गरेको बताए ।
रेडियो सगरमाथाका स्टेसन म्यानेजर उर्वशी बस्नेत न्यौपानेले सामुदायिक रेडियो सगरमाथाले राष्ट्रिय तथा समुदायस्तरमा सञ्चार सेवा पुर्याउँदै आएको बताउँदै जनता र नीति निर्माताको बीचमा महत्वपूर्ण भूमिका निर्वाह गरेको बताइन् ।
‘समुदायको धेरै पाटोहरूमा रेडियो सगरमाथाले महत्वपूर्ण भुमिका खेलेको छ,’ उनले भनिन् ‘यसले खेलेको भूमिकालाई जोगाइ राख्न सबैको साथ र सहयोग आवश्यक पर्छ ।’
नेपाल वातावरण पत्रकार समूहद्वारा सञ्चालित दक्षिण एसियाको पहिलो स्वतन्त्र सामुदायिक प्रसारण सेवा रेडियो सगरमाथाको सुरुआत वि.सं २०५४ जेठ ९ गते भएको थियो ।
