काठमाडौं । मेन्छियाम हाइड्रोपावर कम्पनी लिमिटेडको आईपीओमा दोस्रो दिनसम्म ७.९६ गुणा बढी आवेदन परेको छ । मंगलबार साँझ ५ः१३ बजेसम्ममा ७ लाख ७२ हजार ६९१ आवेदकबाट ७४ करोड ५० लाख ७१ हजार रुपैयाँ बराबरको ७४ लाख ५० हजार ७१० कित्ता सेयरको लागि आवेदन परेको सिडिएस एण्ड क्लियरिङले जनाएको छ ।
जुन सर्वसाधारणलाई निष्कासन गरेको ९ लाख ३४ हजार ९१५ कित्ता सेयरको ७.९६ गुणा बढी हो।
कम्पनीले सर्वसाधारणका लागि वैशाख ४ गतेदेखि आईपीओ निष्कासन गरेको हो ।
कम्पनीले आफ्ना कर्मचारीलाई २२ हजार ४ सय ३९ कित्ता, सामुहिक लगानी कोष योजनाहरुलाई ५६ हजार ९९ कित्ता सुरक्षित गरि सर्वसाधारणलाई ९ लाख ३४ हजार ९ सय १५ कित्ता सेयर निष्कासन गरेको हो ।
सर्वसाधारणले आईपीओमा वैशाख ७ गतेसम्म आवेदन दिन सक्ने छन् । यस निष्कासनमा न्युनतम १० कित्ता र अधिकतम १० हजार कित्ताको लागि आवेदन दिन सकिने छ ।
कम्पनीको सेयर निष्कासन तथा बिक्री प्रबन्धकमा एनआईसी एसिया क्यापिटल रहेको छ ।
कम्पनीले यस अघि अनि आयोजना प्रभावित स्थानीय र श्रम स्वीकृति लिई विदेशमा कार्यरत नेपाली श्रमिकको लागि आईपीओ निष्कासन गरि बाँडफाँट गरिसकेको छ ।
कम्पनीले सङ्खुवासभाको पिलुवाखोलामा ४.७२ मेगावाटको अपर पिलुवाखोला २ जलविद्युत आयोजना निर्माण सम्पन्न गरि विद्युत उत्पादन थालिसकेको छ । कम्पनीले पिलुवाखोलामा नै ७.७ मेगावाटको अपर पिलुआ १ आयोजना निर्माण गर्नको लागि उत्पादन अनुमति पत्र पेश गरेको छ ।
