काठमाडौं । हिमालयन एभरेष्ट इन्स्योरेन्सले गत आर्थिक वर्षको मुनाफाबाट सेयरधनीहरूलाई वितरण गर्न घोषणा गरेको लाभांश प्रस्ताव पारित गर्न साधारण सभा डाकेको छ । कम्पनीले चैत २९ गते, बुधबार २९ औं वार्षिक साधारण सभा बोलाएको हो।
कम्पनी फागुन २३ गते बसेको सञ्चालक समितिको बैठकले सो दिन साधारणसभा गर्ने निर्णय गरेको थियो । सभा वानेश्वर व्याक्वेट, थापागाँउ काठमाडौंमा बिहान ११ बजे सुरु हुने कम्पनीले जनाएको छ ।
सभाले गत आर्थिक वर्षको मुनाफाबाट प्रस्तावित हाल कायम चुक्ता पुँजी २ अर्ब २३ करोड ९९ लाख रुपैयाँको २.७५ प्रतिशतले हुन आउने ६ करोड १५ लाख ९८ हजार ३०० रुपैयाँ बराबरको बोनस सेयर र कर प्रयोजनको लागि ०.१४ प्रतिशतले हुन आउने ३२ लाख ४२ हजार रुपैयाँ नगद लाभांश पारित गर्नेछ ।
साथै, सभाले संस्थापक सेयरधनीहरुको तर्फबाट प्रतिनिधित्व गर्ने ३ जना र सर्वसाधारण सेयरधनीहरुको तर्फबाट प्रतिनिधित्व गर्ने २ जना सञ्चालक निर्वाचित गर्नेछ ।
साविकको हिमालयन जनरल र एभरेष्ट इन्स्योरेन्सको आर्थिक वर्ष २०७८/०७९ को लेखा परीक्षणको प्रतिवेदन सहित वासलात, नाफा नोक्सान हिसाब, नगद प्रवाह विवरण, ईक्वीटिमा एको परिवर्तनहरु समेत पारित गर्नेछ ।
कम्पनीले साधारण सभाको लागि चैत ३ गते बुक क्लोज गर्ने भएको छ । सोहि अनुसार चैत २ गतेसम्म नेप्सेमा कारोबार भई कायम सेयरधनीहरुले मात्रै कम्पनीले वितरण गर्ने लाभांश पाउने छन् ।
