६ महिनामा ५ अर्ब ६३ करोडले घट्यो सेयर धितो कर्जा, कुन बैंकको कति ?

काठमाडौं । चालु आर्थिक वर्षको पहिलो ६ महिनामा लगानीकर्ताहरूले सेयर धितो कर्जाको वापत लिएको ऋण ५ अर्ब ६३ करोड रुपैयाँले घटाएका छन् । गत आर्थिक वर्षको अन्त्यसम्म यस्तो कर्जा ८० अर्ब ५० करोड रुपैयाँ रहेकोमा पुस महिनामा सो कर्जा घटेर ७४ अर्ब ८७ करोडमा झरेको छ ।

चालु आर्थिक वर्षको मौद्रिक नीति मार्फत नेपाल राष्ट्र बैंकले एक व्यक्ति वा संस्थाले एउटा संस्थाबाट बढीमा ४ करोड रुपैयाँ र समग्रमा १२ करोड रुपैयाँसम्म सेयर धितोमा कर्जा लिन पाउने व्यवस्था गरेको छ । राष्ट्र बैंकको यहि नीतिले लगानीकर्तामा दवाव परेपछि बैंक तथा वित्तीय संस्थाबाट लिएका कर्जा लगानीकर्ताले घटाएका हुन् । आर्थिक वर्ष २०७७/०७८ को अन्त्यसम्म सेयर धितोकर्जा १ खर्ब ६ अर्ब रहेको थियो । डेढ वर्षको यो अवधिमा बैंक तथा वित्तीय संस्थामा ३१ अर्ब ४१ करोड रुपैयाँले सेयर धितोकर्जा घटेको छ ।

चालु आवको यो अवधिमा वाणिज्य बैंकहरूले ६ अर्ब ४१ करोड रुपैयाँ सेयर धितो कर्जा वापत लिएको कर्जा घटाएका छन् । २०७९ असारसम्म वाणिज्य बैंकहरूको यस्तो कर्जा ६४ अर्ब ८१ करोड रहेको थियो ।

पुसमसान्तमा आउँदा सो कर्जा घटेर ५८ अर्ब ४० करोडमा सीमित भएको छ । अघिल्लो आर्थिक वर्ष अर्थात राष्ट्र बैंकले सेयर धितो कर्जालाई कस्नु अघिसम्म वाणिज्य बैंकहरू सेयर धितोकर्जामा ९० अर्ब ९२ करोड रुपैयाँ कर्जा प्रवाह गरेका थिए ।

वाणिज्य बैंकहरूको सेयर धितो कर्जा घट्दै गएपनि विकास बैंकहरूले भने यस्तो प्रकृतिको कर्जा बढाउँदै लगेका छन् । वाणिज्य बैंकले सेयर धितो कर्जा नदिए पछि विकास बैंकको कर्जा बढेको हो । पछिल्लो महिनामात्रै विकास बैंकहरूले १७ करोड ६० लाख रुपैयाँ सेयर धितो कर्जा प्रवाह गरेका छन् । मंसिरमसान्तसम्म १२ अर्ब ४९ करोड ३० लाख रुपैयाँ रहेको सेयर धितोकर्जा पुस महिनामा आउँदा बढेर १२ अर्ब ६६ करोड ९० लाख रुपैयाँ पुगेको छ ।

विकास बैंकको सेयर धितो कर्जा बढेपनि फाइनान्स कम्पनीको भने घटेको छ । अघिल्लो महिना मंसिरमा ३ अर्ब ८३ करोड ३० लाख रुपैयाँ रहेको फाइनान्स कम्पनीहरूको सेयर धितोकर्जा पुसमा आउँदा घटेर ३ अर्ब ७८ करोड ८० लाख रुपैयाँमा सीमित भएको छ । गत आर्थिक वर्षको अन्त्य अर्थात असारमसान्तसम्म फाइनान्स कम्पनीहरूको सेयर धितो कर्जा ३ अर्ब ९१ करोड ५० लाख रुपैयाँ थियो ।

सेयर धितोमा बैंकहरूले प्रवाह गरेको कर्जा

यो अवधिमा सबैभन्दा बढी सेयर धितोमा कर्जा नबिल बैंकले दिएको छ भने स्ट्याण्डर्ड चार्टड बैंकले सेयर धितो कर्जा दिएको नै छैन । नबिल बैंकले ७ अर्ब ३० करोड ४२ लाख रुपैयाँ सेयर धितोका कर्जा लगानी गरेको छ ।
सेयर धितो कर्जा प्रवाह गर्ने बैंकमा पनि सबै भन्दा कम यस्तो कर्जा दिने बैंकमा नेपाल एसबिआई बैंक बनेको छ । बैंकले २ करोड ७७ लाख रुपैयाँमात्रै सेयर धितो कर्जा प्रदान गरेको छ ।

सेयर धितोकर्जा बढी प्रवाह गर्ने बैंकको दोस्रो नम्बरमा ग्लोबल आईएमई बैंक परेको छ । बैंकले हालसम्म ६ अर्ब ५४ करोड ९६ लाख रुपैयाँ सेयर धितो कर्जा प्रवाह गरेको राष्ट्र बैंकको तथ्यांकमा उल्लेख गरिएको छ । सेयर धितो कर्जा बढी दिनेमा सरकारी स्वामित्वको राष्ट्रिय वाणिज्य बैंक परेको छ । बैंकले हालसम्म ४ अर्ब ३२ करोड ३० लाख रुपैयाँ सेयर धितोमा कर्जा प्रवाह गरेको छ ।