गण्डकी । कसको जीवनमा कुन वर्ष अन्तिम बनेर आइपुग्छ, के थाहा ? गायिका निरा छन्त्यालको जीवनमा पनि भइदियो, त्यस्तै । ख्यालख्यालमै गाएको गीत आफ्नै जीवनमा मेल खान आइपुग्यो । कस्तो दुर्भाग्य ।
प्रत्यक्ष दोहोरीमा चर्चित गायक राजु परियारसँगको घम्साघम्सीमा निराले जवाफ फर्काएकी थिइन्-
‘हे… सब मरिन्छ, त्यही अन्तिम वर्षमा
बाँचुञ्जेली बाँचम् न हर्षमा…’
जीवनलाई खुसीसाथ जिउनुपर्छ भन्ने उनै निरा आज आफन्त र शुभेच्छुकलाई शोकमा छाडेर आफू भनेभौतिक संसारबाट अलप भएकी छिन् । बाइस वर्षको अल्पायुमै उनको इहलीला सकिएको हो ।
पोखराको सेतीखोंचमा आइतबार भएको यती एयरलाइन्सको जहाज दुर्घटनासँगै निराको मखमली आवाज पनि उतैकतै बिलायो । लोकदोहोरी क्षेत्रमा जबर्जस्त उदाएकी गायिका छन्त्यालले असमयमै मृत्युवरण गर्नुप¥यो ।
गत वर्ष उनी आफैंले गाएको गीतले भनेझैं, निराका लागि यस वर्ष (२०७९) नै अन्तिम बन्यो । न अब कतै युट्युबमा, न मेला र महोत्सवका झकिझकाउ मञ्चमा उनलाई प्रत्यक्ष हेर्न र सुन्न नै पाइने छ । केबल स्वजनका स्मृति र आफ्ना सिर्जनामा निरा बाँचिरहने छिन् ।
बागलुङको बडिगाड गाउँपालिका(३ सिसाखानीमा जन्मिएकी निराको जीवनभर नेपाली लोकसंगीतको सेवा गर्ने उत्कट अभिलाषामा पनि ठेस पुगेको छ ।
लोकगायक विष्णु खत्रीले नेपाली संगीत जगत्ले एउटा प्रतिभावान कलाकार गुमाएको प्रतिक्रिया दिए । ‘प्रत्यक्ष लोकदोहोरीमा उनको छुट्टै पहिचान बनिरहेको थियो, मञ्चीय कार्यक्रममा उनको प्रस्तुति आकर्षक हुने गर्थ्योू, गायक खत्रीले सम्झिए ।
गायक खत्री र गायिका छन्त्यालको सहकार्यमा गत वर्ष पञ्चेबाजा गीत ‘फूल केशरी’ सार्वजनिक भएको थियो । ‘बैनीले अर्को गीत गर्नुपर्छ है दाइ भनिरहेकी थिइन्, नयाँ शैलीको दोहोरीबारे सरसल्लाहमै थियो, अब अधुरै रहने भयो’, खत्रीले सुनाए ।
उनीहरूबीच बुधबार बागलुङको भीमपोखरामा हुने माघे सङ्क्रान्ति मेलामा एउटै मञ्च साझा गर्ने तय भइसकेको थियो । खत्रीकै समन्वयमा निरा भीमपोखराको मेलामा जाँदै थिइन् । स्थानीय प्रगतिशील युवा क्लबले उनीहरूलाई आमन्त्रण गरेको थियो ।
गायिका निराको निधनले मर्माहत बनेका गायक खत्रीले भीमापोखराको उक्त मेलामा आफू पनि नजाने निधो लिएका छन् । ‘बैनीको दुःखद् घटनापछि मैले पनि त्यो मञ्चमा उक्लिएर एक्लै गीत नगाउने निर्णय गरें’, गायक खत्रीले भने, ‘मैले नै सिफारिस गरेर निरा बैनी भीमापोखरा आउने योजना बनेको थियो ।’
आइतबार माघे सङ्क्रान्तिका अवसरमा पोखरामा हुने छन्त्याल समुदायको कार्यक्रममा भाग लिएर गायिका छन्त्याल मंगलबार म्याग्दी महोत्सवमा पुग्ने समयतालिका थियो । त्यहीँबाट बागलुङको भीमापोखरा जाने कार्यक्रम थियो ।
‘बैनी निरासँग मञ्चीय कार्यक्रममा दर्शक, स्रोतालाई मनोरञ्जन दिलाउने कला र शैली अनौठो थियो’, गायक खत्रीले भने, ‘त्यहीँ कारण मेला, महोत्सवमा उनको व्यस्तता बढ्दो थियो, धेरैतिर बोलाउँथे ।’
प्रत्यक्ष दोहोरीको प्रवर्द्धन गरिरहेको ‘सारंगी संसार’ युट्युव च्यानलका सञ्चालक ताराकान्त विकले गायिका निरालाई ऊर्जाशील कलाकारका रूपमा स्मरण गरे । ‘एउटा आशलाग्दो प्रतिभा थिइन्, हँसिलो, चञ्चल, ऊर्जा पनि उस्तै’, विकले भने, ‘मञ्चीय कार्यक्रममा दर्शकरस्रोतालाई अडाइरहन सक्ने क्षमता उनमा थियो ।’
‘सारंगी संसार’का छवटा भागमा गायिका निरा मुख्य भूमिकामा प्रस्तुत भएकी थिइन् । प्रत्यक्ष दोहोरीमा खरो उत्रन सक्ने उनको आफ्नै युट्युब च्यानल पनि छ । चर्चित गायकहरूसँगको उनको दोहोरी घम्साघम्सीले युट्युबमा उल्लेख्य दर्शक पाएको छ ।
तीज गीत, पञ्चेबाजालगायत गीत सार्वजनिक गरेकी निरा प्रत्यक्ष दोहोरीबाट अझ बढी चिनिएको विकले बताए ।
बडिगाड–८ का टीका पाइजाले छन्त्यालले सानैदेखि रुची लिएर गायन क्षेत्रमा लागेको बताए ।
संगीत क्षेत्रमा भविष्य खोज्दै छन्त्याल चार वर्षअघि काठमाडौं छिरेकी थिइन् । गायनमा सफल हुँदै गएपछि उनका माग पनि बढ्दै गएको थियो । शनिबार मात्र काठमाडौंमा आयोजित कार्यक्रममा उनले प्रस्तुति दिएकी थिइन् । सोही दिन टुँडिखेलामा सिसाखानीको ऐतिहासिक घाटु नाच प्रदर्शनका लागि पनि उनी सक्रिय भएर लागेकी थिइन् ।
पोखरा उड्नुअघि निराले सामाजिक सञ्जालमार्फत माघे सङ्क्रान्ति पर्वको शुभकामना दिएकी थिइन् । फेसबुकमा अरुले फर्काएका शुभकामनाका सन्देशसमेत हेर्न नपाउँदै छन्त्याल सेतीखोंचमा अस्ताइन् । बडिगाड–८ का वडाध्यक्ष खडक पुनले गायिका निराको अप्रत्यासित निधनले आफूहरू स्तब्ध बनेको बताए ।
छन्त्यालले विद्यालय तहको पढाइ गाउँकै सिसाखानी माविमा पूरा गरेकी थिइन् । बुवा मनबहादुर र आमा लीला छन्त्यालको कोखबाट जन्मिएकी निराको निधनपछि जन्मगाउँ सिसाखानीमा पनि शोक छाएको छ । उनको शव बुझ्न वडाध्यक्षसहित आफन्त पोखरा झरेका छन् ।
