काठमाडौं । पेट्रोलियम पदार्थको मूल्य बढेर आएको छ । आइतबार भारतीय आयल कर्पोरेसन (आईओसी)ले नेपाल आयल निगमलाई पेट्रोलियम पदार्थको मूल्य बढाएर पठाएको हो ।
नयाँ मूल्यसूचीअनुसार पेट्रोल प्रतिलिटर १ रुपैयाँ ७४ पैसा र डिजल प्रतिलिटर १५ रूपैयाँ ६० पैसाले बढेर आएको छ ।
त्यस्तै, हवाइ इन्धनको मूल्य प्रतिलिटर १० रुपैयाँ २५ पैसाका दरले बढेर आएको छ ।
नयाँ मूल्य अनुसार डिजलबाट हुने नोक्सानी बढेर प्रतिलिटर ६ रुपैयाँ ३४ पैसा पुगेको छ । एल.पी.ग्यासमा प्रति सिलिण्डर ३२५ रूपैयाँ ४४ पैसा घाटा भई पेट्रोल, हवाई इन्धन र मट्टितेलमा केही नाफा हुने निगमले जनाएको छ । यसबाट समग्रमा निगमलाई आगामी १५ दिनमा करीब ३९ करोड नाफा हुने प्रक्षेपण निगमको छ ।
आईओसीले हरेक १५/१५ दिनमा नयाँ मूल्यसूची पठाउने गरेको छ । सोही मूल्यको आधारमा निगमले उपभोक्ता मूल्य तोक्नेछ ।
हाल नेपालमा पेट्रोलको मूल्य प्रतिलिटर १८१ रुपैयाँ र डिजेलको मूल्य प्रतिलिटर १७८ रुपैयाँ कायम रहेको छ ।
