काठमाण्डौ । नेपाल पुनर्बीमा कम्पनी लिमिटेडले आर्थिक वर्ष २०७८/७९ को तेस्रो त्रैमासको वित्तीय विवरण सार्वजनिक गरेको छ।
कम्पनीले गत आर्थिक वर्षको तेस्रो त्रैमाससम्ममा ५७ करोड २३ लाख ८६ हजार रुपैयाँ खुद नाफा कमाएको छ । कम्पनीले निर्जीवन बीमा व्यवसाय ६० करोड २१ लाख रुपैयाँ खुद नाफा आर्जन गर्दा र जीवन बीमा व्यवसायबाट भने २ करोड ९७ लाख ३१ हजार रुपैयाँ नोक्सानी व्योहोरेको छ ।
त्यस अनुसार नेपाल पुनर्बीमा कम्पनीको खुद नाफा ५७ करोड २३ लाख ८६ हजार रुपैयाँमा समिति भएको हो । यो गत आर्थिक वर्षको यसै अवधिको तुलनामा कम्पनीको खुद नाफा ३८.१७ प्रतिशतले कम हो ।
अघिल्लो आर्थिक वर्षको सोही अवधिसम्ममा कम्पनीले निर्जीवन बीमा व्यवसायबाट ८२ करोड ४७ लाख रुपैयाँ र जीवन बीमा व्यवसायबाट १० करोड १० लाख रुपैयाँ गरी ९२ करोड ५७ लाख ९५ हजार रुपैयाँ खुद नाफा आर्जन गरेको थियो ।
यसैगरी, कम्पनीले गत आर्थिक वर्षको तेस्रो त्रैमासमा ७ अर्ब ८६ करोड ८९ लाख रुपैयाँ खुद बीमाशुल्क आर्जन गरेको छ । कम्पनीले निर्जीवन व्यवसायबाट ६ अर्ब ५३ करोड ९९ लाख रुपैयाँ र जीवन बीमा व्यवसायबाट १ अर्ब ३२ करोड ९० लाख रुपैयाँ गरी सो बराबरको बीमाशुल्क आर्जन गरेको हो । यो अघिल्लो आर्थिक वर्षको तुलनामा ३३.७९ प्रतिशत बढेको हो ।
अघिल्लो आर्थिक वर्षको सोही अवधिमा कम्पनीले जीवन तथा निर्जीवन बीमा व्यवसायबाट ५ अर्ब ९२ करोड ५६ लाख रुपैयाँ मात्रै खुद बीमाशुल्क आर्जन गरेको थियो ।
यस्तै, गत आर्थिक वर्षको चैत मसान्तसम्ममा कम्पनीले पुनर्बीमा कमिशन बापत १ करोड ४९ लाख ७२ हजार रुपैयाँ र लगानी कर्जा तथा अन्य आयबाट ४० करोड ९१ लख ३९ हजार रुपैयाँ आम्दानी गरेको छ ।
कम्पनीले यस अवधिमा ४ अर्ब ४७ करोड ६६ लाख रुपैयाँ कुल दाबी भुक्तानी गरेको छ भने २ अर्ब ३ करोड ६५ लाख रुपैयाँ भुक्तानी गर्न बाँकी छ । यस अवधिमा कम्पनीले ८ अर्ब ७८ करोड ७६ लाख रुपैयाँ कुल बीमाशुल्क आर्जन गरेको छ ।
चुक्ता पूँजी ११ अर्ब ६५ करोड रुपैयाँ रहेको कम्पनीको जगेडा कोषमा ४ अर्ब ५० करोड ९ लाख रुपैयाँ र बीमा कोषमा २ अर्ब ५४ करोड ७९ लाख रुपैयाँ सञ्चित छ ।
कम्पनीको वार्षिकीकृत प्रतिसेयर आम्दानी (ईपीएस) घटेर ६.५५ रुपैयाँमा झरेको छ। अघिल्लो वर्ष ईपीएस १२.३४ रुपैयाँ रहेको थियो। पीई रेसियो १५७.२१ गुणा रहेको कम्पनीको प्रतिसेयर नेटवर्थ १६०.५१ रुपैयाँ रहेको छ।
