काठमाडाैं । गैरआवासीय नेपाली संघको निर्वाचन मिति परिवर्तन भएकाे छ । विवादका कारण एनआरएनको निर्वाचन कार्य तालिका पछि सरेको छ । आगामी चैत ७ र ८ गते हुने भनिएको निर्वाचन ३ दिन पछि चैत १० र ११ गतेका लागि तय गरिएको हो । शनिबार एनआरएनए निर्वाचन समितिले एक सूचना जारी गर्दै निर्वाचन मिति सारिएको जानकारी दिएको छ ।
जारी सूचनामा विद्युतीय माध्यामबाट हुने भनि तय गरिएको निर्वाचन प्राविधिक पक्षलाई मध्यनजर गरी चैत १० र ११ गते (मार्च २४–२५ ) हुने बताइएको छ । सूचनामा सो मितिमा निर्वाचन गर्न उपयुक्त हुने अन्तर्राष्ट्रिय समन्वय परिषदका अख्तियार प्राप्त अध्यक्षबाट लिखित निर्देशन प्राप्त भएको समेत उल्लेख गरिएको छ ।
समितिले निर्वाचन कार्यतालिका समेत संशोधन गरेको छ । संशोधित कार्यतालिका अनुसार मार्च १२ मा उम्मेदवारको पहिलो नामावली प्रकाशित गर्ने, सोही दिन उम्मेदवारी विरुद्ध दावी विरोध गर्ने, मार्च १३ मा उम्मेदवारहरूको मनोनयपत्रको जाँच र उजुर उपर निर्णय गर्ने, सोही दिन उम्मेदवारहरूको दोस्रो नामावली प्रकाशित गर्ने लगायतका रहेका छन् ।
