काठमाडौं । जाल्पा सामुदायिक लघुवित्तको आईपीओमा पहिलो दिन नै १५ गुणा बढी आवेदन परेको छ । पहिलो दिन लघुवित्तको सेयर हात पार्न ५ लाख ८१ हजार ४९८ जनाले आवेदन दिएका हुन् । शुक्रबार साँझ ५ बजेसम्म उक्त संख्यामा आवेदन परेको सिडिएस एण्ड क्लियरिङ हाउसले जानकारी दिएको छ । लघुवित्तको आईपीओ आज शुक्रबारदेखि खुलेको हो ।
पहिलो दिन ५ लाख ८१ हजार ४९८ जना आवेदकले ७२ लाख ६५ हजार ४६० कित्ताका लागि ७२ करोड ६५ लाख ४६ हजार रुपैयाँ बराबरको आवेदन दिएका हुन् ।
कम्पनीले प्रति कित्ता १ सय रुपैयाँ अंकित दरका ५ करोड २२ लाख बराबरको ५ लाख २२ हजार कित्ता सेयर निष्काशन गरेको हो । जस मध्ये ८ हजार कित्ता सेयर कम्पनीको कर्मचारीहरुको लागि छुट्याईएको छ भने २६ हजार १ सय कित्ता सामूहिक लगानी कोषको लागि छुट्याईएको छ । बाँकि रहेको ४ लाख ८७ हजार ९ सय कित्ताको लागि सर्वसाधारणले आवेदन दिन सक्ने छन् ।
आईपीओमा माघ २५ गतेसम्म आवेदन दिन सकिनेछ । आवेदन दिँदा न्युनतम १० कित्ता र अधिकतम ५ हजार २२० कित्ताका लागि दिन सकिने छ ।
कम्पनीले सेयर निष्काशनको लागि प्रभु क्यापिटललाई बिक्रि प्रबन्धक नियुक्त गरेको छ ।
