काठमाडौं । प्रहरीले काठमाडौंबाट अनलाइनमार्फत जुवा खेलाउने १२ जनालाई पक्राउ गरेको छ । प्रहरीले गोप्य सूचनाका आधारमा महानगरीय अपराध महाशाखाबाट खटिएको टोलीले उनीहरूलाई कीर्तिपुर नगरपालिकाबाट पक्राउ गरेको हो ।
उनीहरूलाई जुवा खेलाउन प्रयोग हुने ल्यापटप, मोबाइल लगायत उपकरणहरूसहित पक्राउ गरिएको प्रहरीको भनाइ छ । पक्राउ पर्नेमा सुजेन्द्र थापा, मनिष थापा, समिर थापा, कविता थापा, रविन खड्का, बुद्ध महर्जन, हनिशा महर्जन, रोजा महर्जन ,साहिल महर्जन, प्रदीपमान सिंह बस्नेत, विनोद ठगुन्ना र रमादेवी श्रेष्ठ रहेका छन् ।
उनीहरुले फेसबुकबाट अमेरिकी र युरोपेली नागरिकलाई साथी बनाई अनलाइन जुवा खेल्ने लिंक सेयर गरी अमेरिकन डलर लोड गर्न लगाई गेम खेलाउने गरेको पाइएको प्रहरीको भनाइ छ ।
उनीहरूले विगत १० महिनाअघि देखि महिनाको करिब १ लाख अमेरिकी डलरभन्दा बढी रकम हारजित हुने गरी जुवा खेलाउने गरेको समेत खुल्न आएको छ । पक्राउ परेका १२ जनालाई आवश्यक कारबाहीका लागि महानगरीय प्रहरी परिसर काठमाडौं पठाइएको छ ।
