काठमाडौं । एक्सेल डेभलपमेन्ट बैंक लिमिटेडले चालु आर्थिक वर्ष २०८१/८२ को दोस्रो त्रैमासको वित्तिय विवरण सार्वजनिक गरेको छ ।
चालु आर्थिक वर्षको पुष मसान्तसम्म बैंक ९ करोड ५ लाख रुपैयाँ घाटामा रहेको छ । अघिल्लो आवको सोही अवधिमा बैंक ६ करोड ९९ लाख रुपैयाँ घाटामा रहेको थियो ।
बैंकको खुद ब्याज आम्दानीमा गिरावट आउँदा घाटा झनै बढेको छ ।
समीक्षा अवधिसम्म बैंकले १९ करोड ६४ लाख रुपैयाँबराबरको खुद ब्याज आम्दानी गरेको छ । यो गत आवको तुलनामा ४.६४ प्रतिशतले कम हो ।
बैंकको खुद ब्याज शुल्क तथा कमशिन आम्दानी पनि २४ करोड २५ लाखबाट घटेर २३ करोड ३१ लाख रुपैयाँमा झरेको छ ।
समिक्षा अवधिमा बैंकले २० लाख २० हजार रुपैयाँबराबरको अन्य सञ्चालन आम्दानी गरेको छ ।
अघिल्लो आवमा १६ करोड १६ लाख रुपैयाँ रहेको बैंकको इम्पेयरमेन्ट चार्ज बढेर १७ करोड ४१ लाख रुपैयाँ पुगेको छ ।
समीक्षा अवधिसम्म बैंकको रिटेन्ड अर्निङ ८ करोड ७७ लाख ऋणात्मक र रिजर्भको आकार ८० करोड १४ लाख रुपैयाँ धनात्मक रहेको छ ।
बैंकको प्रतिसेयर कुल सम्पत्तिको मूल्य १ हजार ३८३ रुपैयाँ, पीई अनुपात ४०.३७ गुणा र तरलता अनुपात २८.९९ प्रतिशत कायम भएको छ ।
बैंकको वितरणयोग्य मुनाफा ८ करोड ७७ लाख रुपैयाँले ऋणात्मक र वार्षिक वितरणयोग्य प्रतिसेयर आम्दानी १४.०४ रुपैयाँले ऋणात्मक छ । बैंकको खराब कर्जा अनुपात ४.७० प्रतिशतबाट बढेर ८.५६ प्रतिशत पुगेको छ ।
समीक्षा अवधिसम्म बैंकको प्रतिसेयर आम्दानी (ईपीएस) १४.४९ रुपैयाँले ऋणात्मक, प्रतिसेयर नेटवर्थ १५७.८४ रुपैयाँ रहेको छ ।
